兩個夠晒數 葉翠翠堅決封肚

前港姐葉翠翠去年誕下大仔「小王子」後，幾乎全職湊B；四個月前再誕下細仔「小小王子」，翠翠更24小時奉獻給兩個囝囝。一直恨生女的她，已下定決心封肚，皆因再生B的精神壓力實在太大。

葉翠翠昨日到灣仔接受何基佑主持的ViuTV節目《超級奶爸2》訪問，分享湊B心得，已是兩子之母的翠翠，自言仍有學習空間︰「其實我都要學下點教小朋友，因為有好多小朋友都會野蠻同百厭，我都想知道有無啲特別方法去教，而唔需要打同鬧小朋友。」

小王子疼惜細佬

現時已是全職主婦的她，笑言每日最大娛樂就是看着小朋友成長，她說︰「大仔依家開始喜歡探索，鍾意走嚟走去。」問到囝囝可有欺負她？翠翠苦笑說：「咁又無，不過囝囝成日要我陪佢玩，有時我好疲累想休息一下，佢都會捉住我坐低，望住佢玩。」

提到大仔「小王子」現已歲半大，翠翠讚大仔對四個月大的細仔相當疼惜，大仔更會將自己的玩具讓給弟弟玩，不會呷醋。問翠翠還會考慮再追一位公主？她坦言會堅決「封肚」：「我好大精神壓力，因為每日都要喺網上分享，如果再懷孕，精神壓力會仲大。我個Facebook依家有好多人睇，變成佢哋嘅寄託，我唔可以五日唔update。所以我每日分享一次，希望幫到大家。」

撰文︰Pauline

攝影︰林良明

編輯：李潔盈

美術：顏玉玲