【明報專訊】𠵱家啲電子產品及電器有唔同操作按鈕，唔少長輩未必知道點操作。香港資訊科技學院（HKIIT）高級講師郭譽豪話，有一次上堂期間收到外母求救電話，話唔識用新買嘅洗衣機，佢用電話講解好難溝通到。事件令佢萌生一個意念，設計手機應用程式教長輩操作電器，程式仲攞到「2023香港資訊及通訊科技獎」等多個科技比賽獎項，創作團隊奪得共約15萬元獎金，及獲得唔少參展機會。
App名為「Dokodemo Call 隨意通」，取材自日漫主角嘅法寶「隨意門」。程式由HKIIT老師及職業訓練局（VTC）軟件工程高級文憑畢業生開發。手機程式將AR技術融入視像通話中，當長輩用程式與仔女視像通話時，可先用鏡頭對準電器或電子產品，電話另一端嘅子女清楚睇到儀器時，子女可實時喺視像畫面中添加唔同顏色嘅AR圖示，如箭嘴、旋轉符號、交叉、步驟數字等，長輩可於畫面睇到圖示，二人邊對話邊跟住指示步驟。
團隊之前搵咗十幾名年長親友試用，蒐集意見，調整咗AR圖等，令作品更適合銀髮族使用。
相關字詞﹕手機應用程式