「口靚模」遇上茅山師傅，聲稱可以用「男女交合」法術改運的案件，雖然告一段落，不過經此一役，不少娛樂圈中人亦被拖落水，方力申被指與案中的茅山師傅稔熟，甚至有傳介紹圈中人幫襯，幸得好朋友鄧麗欣挺身澄清。

不過，娛樂圈中人信奉茅山、六壬等方術的甚多，有茅山師傅就向本刊爆料，指娛樂圈中有很多男、女藝人都曾經試過各色法術，更成功靠此闖出名堂甚或搵快錢。

該名茅山師傅更直指○九年人氣極速暴升的周秀娜，曾七次幫襯一位道行極高的師傅，於四十九日之內進行七次「推金法事」，成功借運達到最短時間內吸金的效果，在短短一年內由寂寂無聞的二打六模特兒，晉身成炙手可熱的女明星。

推金法事五部曲

司徒法正指在泰國及馬來西亞有不少高僧會替人做「推金法事」，將金箔推入身體後，運氣便會變好。道家法科之中，亦有類似的法門，但善信推金前，需要齋戒沐浴三日，及在晚上夜深時份作法，而且要脫衣方便師傅為其推金，此法有增強運勢，催旺財運及人緣桃花之效。

作法前需先齋戒三日，每天用七色花（即七種不同顏色的花）沐浴淨身。

揀晚上十一時至凌晨一時，在神壇前作法上香，並請師傅唸經。

脫去衣服（女士可穿內衣），師傅灑符水淨身及唸咒。

善信躺下（牀或長椅），師傅用香油為善信搽勻全身。

師傅唸咒，取出金箔，結手印，由正面，從頭部開始，由上而下，推金箔入體內。正面完成，到背面，從頸開始，一直推到腳。直至金箔滲入身體。每隔七日做一次，共需四十九日才完成整個程序。

極速爆紅

入行四年的周秀娜，早期影過不少性感相，又拍過多部電影，但做來做去都係三、四線角色，頂盡是得到「翻版樂基兒」稱號，始終不為人認識。但自從年多前拍纖體廣告，當街撕衫之後，一炮而紅，連盧海鵬都要在節目中模仿。

據知年前周秀娜見發展一直唔多理想，而年紀比早已走紅的o靚模始祖Angelababy還大幾年，為免被人淘汰，決定把心一橫搵師傅幫手增運，祈令事業一帆風順。

成名前的周秀娜已做model近三年，一直未能出位，就算是拍廣告都只能企埋旁邊做「二打六」。

七萬改命

在模特兒公司朋友介紹下，據知周秀娜選擇了做茅山的「推金法事」，由於想快點有成效，就算用上幾年來的積蓄亦在所不計，皆因每次法事要用上足金金箔，連師傅的利是已花上一萬元，而且做七次才有非常顯著成效，擺明盡地一煲。

每次做「推金法事」前，周秀娜總會向公司請假幾日，方便事前齋戒三天，做法事時，又要脫衣半裸躺在師傅面前，令她甚為尷尬，最後脫剩內衣褲施法，雖然金箔未有推勻全身，但以她目前的吸財賺錢能力，已經好過不少藝人。

就「推金改命」一事向周秀娜求證，起初否認曾祈福轉運，更說唔知「推金」係乜，不過後來又承認自己迷信：「我唔信呢啲嘢，亦都冇聽過冇去做過，但係早幾年同朋友去泰國，跟佢哋去拜四面佛，許願之後又真係得喎，之後每年都會返去還神，希望會愈來愈好。」

對於被指曾找茅山師傅做改運法事，周秀娜一聽「推金」兩字即耍手擰頭迴避，不過就直言自己都幾迷信。

周秀娜一年吸金六百萬

不老中生 點燈吸靈氣

駐顏有術的「不老中生」，娶老婆之後，修心養性，減少幕前演出，轉行搞生意。舊年返港，興之所至，又返大婆台拍劇過吓癮。

「不老中生」自認練氣功養生，其實多年前，已經常同老婆去四川吸靈氣，而且在寺廟內供有長生祿位為自己添福，又每隔一段時間點「九星燈」連續九日，催財增運。十幾年來轉戰內地，單是生意的收益，已為他帶來過億身家。

樂壇天后 轉運再搵銀

「樂壇天后」情路都幾坎坷，對另一半死心塌地，踢都唔走，反而工作上，就成日擺出一副唔志在嘅樣，好似想退休咁。

近呢幾年，見事業上冇乜突破，就收埋自己，原來佢同「福祿壽」一樣，其實都仲好想搵錢，所以就迷上推金法事，仲要搵泰國好出名嘅法師親自為佢作法。

推咗之後，個人又真係醒神晒，仲有工作畀佢任揀，揀啱先做，價錢仲好好添。

福祿壽一年推兩次

在行內打滾幾十年的「福祿壽」，早已搵夠上岸，但多年來仍未退休，無法啦！要養家，唔想辛苦都唔得。

其實「福祿壽」十幾年前開始，就有鋪癮去泰國拜神，仲搵當地師傅做增運法事，一年最少做兩次，用成両黃金製成金箔，推入身體，有助養顏兼吸財。

自從用了這方法後，「福祿壽」果然年年都賺唔少，仲帶挈唔少後輩跟住佢搵錢，都算係咁咯。

惠英紅奇門法吸財

由打女變成師奶代言人的惠英紅，入行多年都儲不到錢，好彩遇到精通奇門遁甲的謝富坤師傅幫助，叫她將物業及現金等值錢東西，轉到家人名下，否則都不會有今日的千萬家財。唔單止儲錢，謝師傅又教她戴晶石鏈改運（見左圖），等佢事業同財運變得順遂。

除此之外，紅姐為催旺財運，在家中擺吸財陣，方法是用新毛筆點上朱砂，以一啖氣時間，在紅紙上閉氣寫上「善信×××，生於×××，（願望）」，再貼在陶瓷器皿外，而器皿內盛載的零錢，又要從大型連鎖店每天購物收集回來，以吸其財氣。並要每天放錢入陶瓷器皿內，再放在睡牀板底下的背脊位置，才叫布陣完成。在多方面夾攻下，去年底紅姐就憑《心魔》奪得台灣金馬獎的「女配角」獎，威到海外。

手戴多條改運手鏈的紅姐，近幾年狀態大勇，連奪多個影圈獎項。

吸財法看似簡單，只需收集散銀便可，不過原來要閉氣寫字一點也不易。

惠英紅與謝師傅相識多年，每年謝師傅擺壽宴，紅姐必定禮到人又到。

整容名模 水晶吸運

「整容名模」出道時冇乜人留意，全靠借助緋聞，拖住個男朋友四圍去，先至為人認識。

做了幾年模特兒叫做捱到長做長有，搵到吓錢，但係點都冇辦法釣到個金龜。但自從同行好友介紹咗個師傅畀佢識，幫佢用水晶施法造咗個愛情咒，仲叫佢日日隨身攜帶，冇幾耐就識到依家個男朋友，就算偷完食都識返屋企。

是非名媛 奇法招姻緣

港姐出身的「是非名媛」，經歷過一段不如意的婚姻之後，仍渴望遇到第二春，只係真愛難求，要搵都唔係咁易。

為搵個好歸宿，「是非名媛」可謂瞓身去搞，由朋友穿針引線搵某高人教路，經指點後，用手帕包住頭髮及指甲，及在一日的廿四小時之內，握住手帕與一百對新人握手。為等呢個機會，「是非名媛」不惜飛往內地參加大型集體婚禮。半年後又真係畀佢嫁得出，仲同老公搞酒吧生意，做到有聲有色。

只需自己的指甲頭髮便可施法，但必需自己親力親為與一百對新人握手才可催旺桃花。

今年十月十日於上海便會舉行集體婚禮，取其「十全十美」之義。

專家講解 奇門遁甲

以奇門遁甲幫不少人擺風水陣的謝富坤師傅，年輕時曾拜林蛟學北派武功，又曾為警隊服務，因而認識不少名人及藝人。

謝師傅客路甚廣，除警界外，亦有不少娛樂圈中人幫襯，如周汶錡、周麗淇兩姊妹及鍾慧冰等。「仲有蘭子（陳道然）都係朋友。奇門遁甲是一門比較冷門的法術，傳人都要安貧樂道，所以今時今日，我仍然住公共屋邨！」謝師傅更說做人最緊要開心，錢搵幾多都冇用。

周汶錡與謝師傅認識多年，更曾獲師傅送贈多條水晶手鏈催運。

黎耀祥吸運寶箱

在無綫做過二打六多年的黎耀祥，近年得到區仲德師傅幫助，在他的家中擺放三個催運寶箱，包括「五路財神局」、「人緣催旺局」及「名譽催運局」。而每個寶箱，都要放入有吸收能量的水晶，以及由師傅施法的神符，再跟方位擺放。由於三個寶箱的功效不同，據講祥仔為此搬新居來擺陣，在書房擺正財寶箱來增強正財運，而屋中的中央位置的財位，擺放偏財寶箱吸收偏財，而名譽及人緣寶箱就放在睡房內。前年《台慶頒獎禮》就憑《秀才愛上兵》奪得「最佳男配角」，去年更憑《巾幗梟雄》成三料視帝，名利雙收。

撈得風生水起的黎耀祥回應說：「我同區仲德師傅好熟，佢有幫我擺風水陣。」

擺放寶箱要根據每間屋的坐向，及屋主的八字而放，並非人人用同一個陣。

最靚港姐 跪樓梯表誠意

「最靚港姐」當選之後拍過唔少劇，之後仲進軍大銀幕，只係初期發展一般，有名無利。

後來，佢得到一位半退隱的邵師傅幫手，借了五年大運。當時，那位師傅答應幫佢之前，有一個附帶條件，要求佢由大廈地下，以雙膝跪地，仲要跪足七層樓梯上門先肯出手，經過師傅幫忙之後，真係冇幾耐就畀「最靚港姐」執二攤接咗部戲，仲一炮而紅，拎埋影后。

不過光陰似箭，五年好快過去，依家影后冇乜戲拍，平日相夫教子，間中返娘家拍劇，當作保持曝光率。

其實早幾年梁思浩的《尋找娛樂圈隱世高人》一書內，便曾提過有關這位「最靚港姐」的奇遇。

格鬥男星 屋下有乾坤

「格鬥男星」在海外市場好吃得開，身手不凡嘅佢，有名有利，仲有個幾靚老婆，係男人都羨慕。

唔講唔知，平時唔多拜神的他，其實都幾迷信，仲要一係唔做，一做就去到盡。有傳佢間大屋，就搵師傅擺咗個邪門陣。先响間屋嘅五個地方掘窿，再埋五條動物屍體。聽講用呢個方法，有「五屍運財」效用。

自從用呢個方法之後，果然每次開工都有過千萬收入，不過聽落就毛骨悚然。

這個運財局施行上必須在屋內或花園掘窿，實在非每個人均可依法照做。就如吳佩孚師傅所言，如不是獨立屋（上圖為示範單位）的格局，實在無法施行此「五屍運財局」。