【廿四孝男友】蕭正楠送花賀女友翠如生日 發放閃光彈好sweet
撰文：郭敏玲
出版：更新：
玩玩下遊戲，蕭正楠拎住紮花同翠如賀生日，好sweet。（郭敏玲攝）
未出街已甚有話題性的TVB台慶劇《幕後玩家》又有宣傳活動，一眾演員黃宗澤、蕭正楠（Edwin）、黃翠如、龔嘉欣及劉佩玥等演員均有出席。剛巧今日(23號)是翠如的34歲生日，廿四孝男友Edwin與其他演員夾手夾腳製造驚喜，送花送蛋糕慶祝女友生日，即場發放閃光彈，真是好sweet。
難得女友生日，放下閃光彈無所謂啦！（郭敏玲攝）
翠如的生日願望竟然送晒畀人，在台上講到希望新劇《幕後玩家》收視理想，事後再問她，也說：「我之前都好想曹永廉拎男配角，他昨日在《星和無綫》攞了獎，我希望他之後再攞。」同阿廉咁老友，生日願望都係他，咁自己呢？翠如就話想再嘗試更加多新事物，回想起自己以前背包旅行，有機會都想再背包行一兩個月。不過話個計劃無預到男友蕭正楠喎，點解？翠如笑言：「兩個一齊去就無人做嘢，咁又唔得。」然後就話獨遊係難得有勇氣會做的事，想試下咁解。
但大家當然唔收貨，大叫「Brithday Kiss」，後來黃宗澤幫手一推，蕭正楠錫咗落翠如塊面到。無錯，就係呢下。（郭敏玲攝）
兩人不急於結婚
至於生日大日子，翠如會如何過？她說：「其實最近好忙，之後又要飛返去泰國拍劇，今日又有兩個活動出席，頭先當係同大家慶祝啦，因為都好難得有一大班人。」Edwin同樣都要忙拍劇。問到男友蕭正楠有甚麼表示？他笑言要保持神祕。兩人暫時未心急想結婚，都係隨緣就好，而Edwin講笑話：「劇入面結過婚，要儲多陣經驗同默契。」又指對方忙拍劇忙到出年年中。結婚這回事要慢慢計劃一下，不能草率。此外，兩人都好有默契表示他們在劇中是不離地的公關，均指：「劇同宣傳片唔一樣㗎。」
蕭正楠同黃翠如拖手仔慶生。（郭敏玲攝）