讚外父李兆基 好學敢嘗試

【明報專訊】鄭啟文共有5兄弟姊妹，他排行第二，父親鄭天順是知名的金牌經紀，五六十年代經營股票公司，主要為華資大孖沙服務，包括為李兆基進行股票買賣等。

鄭啟文念土木工程 擅拆解問題

鄭啟文小時候於聖保羅男女校接受教育，11歲時負笈英國入讀寄宿學校。他感激父親非常重視子女教育，安排幾兄弟姊妹到優良的學校念書。「我入大學之前喺香港會（早年的股票交易市場分四會）做咗1年，了解到一啲公司點解會成功，一啲公司點解會失敗，有咩因素吸引人投資，對日後嘅工作有深遠嘅影響。」他又指出，自己大學時修讀土木工程及結構工程，從而學會高度的分析能力，「土木工程同結構工程教曉我點樣將大問題拆解成3000個小問題，再將小問題逐一擊破，我成世都好受用。」

鄭啟文是恒基（0012）主席李兆基的女婿（次女李佩玲的丈夫），坦言多年來從外父李兆基身上學會很多做生意及處世的道理。鄭指李是個非常好學、勤力而且「好肯問」的人，做事很有魄力，「每晚晚飯後便『開工』，會同伙記一齊研究金融市場上嘅新產品，又討論業務上近期發生嘅事，遇到唔識唔熟又會請教專家，問到專家口啞啞為止，學識咗又夠膽嘗試，佢對於所學到的亦好有信心，呢啲喺做生意上面教識我哋好多」。至於處世方面，他又大讚外父「一個咁忙嘅人仲會抽時間去關心人、捐錢做公益事」，顧及社會顧及他人，笑言自己絕對做唔到。