「母子」情深 坤哥獻自己賀樊亦敏牛一

樊亦敏前晚48歲生日，無綫新劇《大醬園》一眾台前幕後為她舉行生日飯局，有份演出的吳業坤（坤哥）即使前日不用開工，亦特地現身祝賀壽星女，更搞笑指要將自己獻給對方做生日禮物。

吳業坤前晚一身便服現身電視城，為樊亦敏慶生，坤哥笑言來「呃飯食」，又作狀吻賀壽星女。坤哥大讚樊亦敏是靚姐姐︰「我睇過佢以前演出嘅電影同劇集，嘩！點解可以咁靚？我每次見到佢都會咁講，之前喺《愛‧回家》佢做過我阿媽。」問坤哥會送甚麼生日禮物？他笑說：「我喺群組入面話送自己畀佢，佢好似幾開心。佢想我點樣送畀佢就點送，我都接受到！（有沒有底綫？）OK啦，一晚半晚，做咩都可以！」他大讚樊亦敏是一位非常好的前輩：「佢送過一張外景凳畀我，得我有咋！」

車尾被撞

另外，坤哥日前駕駛期間，被一輛私家車從後撞上，他表示已透過友人調解中。他說：「因為我係好心軟嘅人，最緊要人無事，我見到對方落車嗰陣撳住心口，都有啲擔心。」他估計要花五位數字修理座駕，可能會乘機換車。他說：「我無諗過放棄揸車，我係安全駕駛者，次次都係被人撞。」

朱晨麗拒錫何廣沛

同場的緋聞男女何廣沛與朱晨麗，日前雙雙拍攝落水戲，朱晨麗說：「場戲講我喺條河度沖涼，佢（何廣沛）就游水，佢為咗曬肌，已經食雞胸肉減肥，結果拍嗰陣佢見暈。」何廣沛聞言笑說：「我仲以為佢（朱晨麗）讚我為套劇付出咗咁多，原來只係話我孱弱。」

問朱晨麗會否錫錫何廣沛「呵番」？她即笑說：「唔錫佢！場戲本來佢要撑住我，但佢企唔穩，搞到我仆落去，成隻腳瘀晒。」何廣沛則反駁指事發時，自己不惜做「人肉墊」保護佳人。

撰文︰Pauline

編輯：李潔盈

美術：梁政敏