爛滾有喜!
雖然話「爛滾」一詞充滿貶義,但係放喺新世代女神周秀娜(Chrissy)身上,咩負面色彩都一掃而空!我講緊係Chrissy同杜汶澤擔綱嘅新戲《爛滾夫鬥爛滾妻》,係王晶出品,一睇就知係喜劇,認真你便輸了!
既然係喜劇,我就帶Chrissy同佢戲中嘅其他女對手鍾采羲(Iris)同羅子喬(Bella),一齊去到位於尖沙咀The ONE嘅「明珠小館」,歎住淮揚小菜暢談「爛滾」趣事。
今晚我帶「爛滾」女將Bella、Iris同Chrissy(左至右)去到「明珠小館」歎淮揚菜,同時大談拍電影時嘅趣事。
興奮試滾
Chrissy喺戲中同阿澤(杜汶澤)最多對手戲,佢話阿澤教佢唔少嘢之外,自己都有額外收穫,「雖然今次唔係我第一次同阿澤合作,但係我哋飾演一pair情侶,今次真係第一次。最開心係劇情講我同佢都係貪玩、爛滾嘅人,咁現實生活嘅我冇試過去滾,並唔係一個咁樣嘅人,所以有得做一個咁嘅角色,都好好玩。」
Chrissy以紙巾當餐牌,示範為大班朋友點菜實況。
哈哈哈!Chrissy首嘗「滾」之味,同時亦大讚對手阿澤,「大家都知阿澤係一個好玩得同好有趣嘅人,所以成個拍攝過程都好開心,片場入面成日有笑聲。雖然我同佢有啲親密戲份,但係就係因為佢咁風趣,我一啲都唔覺得尷尬,反而成日都忍唔到笑。」
電影以外,Chrissy近期北上拍劇掘金,今晚飯敍之前,佢啱啱由長沙返港咋!「之前一直喺北京拍劇,嗰度係五環以外嘅地區,方圓百里乜都冇,好彩我助手係廚藝高手,好多時都係佢照顧晒我嘅飲食。不過,有時我哋都會去北京市區打邊爐,當係解吓渴。
「我好鍾意食嘢,最好係一大班人一齊食,咁就可以試晒餐廳嘅菜式。通常我都係做發辦嗰個,拎住個餐牌研究一輪先,再幫啲朋友點菜。」
另一前菜風味燒鱔粒($78),鱔肉新鮮香滑,非常惹味。
花雕醉雞($68)用上一日醃製,酒香撲鼻,雞肉鮮嫩。
七味炸金菇($38)糅合傳統及創意,香脆可口。
新人上場
稱得上係「爛滾」,Chrissy喺戲中梗係有唔少「情敵」,而Iris同Bella就係其中兩位。Iris喺電影入面同Chrissy係「閨密」,不過其驕人身段就成為咗阿澤嘅誘惑。
「我喺戲入面有一場感覺上全裸嘅沖涼戲份,拍嘅時候清咗場,我都有貼膠紙,不過都會有啲尷尬,始終今次係我第一次拍啲咁嘅場面。晶哥有一邊睇mon一邊教我,仲有阿澤,佢啲眼神同動作都幫咗我入戲,仲畀埋空間我自由發揮添!」
至於Bella亦有同阿澤交手,「我喺戲入面飾演女鬼,哈哈!其實係扮嘅,主要係同阿澤做對手戲。拍嘅時候我都幾緊張,不過好彩都冇乜點NG,晶哥同阿澤先後都畀咗好多拍戲嘅錦囊我,真係要好多謝佢哋!」
哈哈哈!兩位影壇新人都各有發揮,最有眼福我相信一定係觀眾啦!
Bella(左)同Iris(右)同為影壇新秀。
Chrissy近月驛馬星動,經常往返中國、香港,忙得不可開交。
青欖燉螺頭($98)燉足3個鐘,清咽潤肺,秋日滋陰最啱。
葱花炒蠔爽($68)皮薄蠔鮮,我大力推介!
百頁紅燒肉($88)炆得入味,豬腩肉毫無膩感。
鍾情拔絲
喺訪問兩位女新人嘅同時,Chrissy已經將目光移至其中一道甜品拔絲香蕉上,「我好鍾意食拔絲嘅甜品,香蕉好食過蘋果!同埋我好想知道師傅點樣將啲糖漿拔到咁高,好考功夫!」
一邊講,Chrissy已經走到大廚身旁,拍低拔絲過程,師傅一絲不苟嘅同時,Chrissy亦一臉認真。
原來因為Chrissy都愛下廚,「以前得閒會幫老竇煮吓,佢係高手,我純粹係助手,o依家佢少咗煮,我忙亦都幫唔到手。不過,我仲記得佢煮唔少潮州菜式,喺街食唔到!」
哈哈哈!Chrissy嘅溫暖牌私房潮州菜,又點會咁容易食到?今晚佢就話:「呢餐係我呢個幾月嚟食得最豐富嘅晚餐,真係要多謝Paco!」