政Whats噏：入境處樂隊橫風橫雨演奏　觀眾勁讚拍爛手掌

入境處以人為本嘅服務態度同埋嚴正執法嘅專業形象就係人都知架啦，但大家又知唔知佢哋嘅樂隊都專業過人，每次表演都全情投入、絕不欺場呢？話說今朝（19日）網上瘋傳一段影片，見到一隊着住整齊制服嘅樂隊喺狂風大雨下演奏。再睇真啲，原來係入境處樂隊喺消防及救護學院表演緊。

據知，今朝消防處舉行嘅結業會操邀請咗入境處樂隊演出，期間風雲色變，狂風暴雨突如其來，天文台更發出黃色暴雨警告，但樂隊成員仍緊守崗位，無懼風雨繼續演奏，表演完畢後全場「拍爛手掌」，現場嘉賓同埋觀眾都企起身拍手致意，大讚入境處樂隊成員堅忍不拔，即使面對風雨如磐，亦矢志完成演出。

據了解，今次入境處樂隊派出35名樂手參與表演，亦係樂隊首次派員為其他紀律部隊結業會操演出。除咗演奏《義勇軍進行曲》同埋入境處部門歌曲《心向前》之外，仲演奏咗重新編曲嘅銀樂版消防處部門歌曲《心比火熱》，呢首曲亦係首次公演。