【明報專訊】政府早前公布區議會改革方案，民政及青年事務局長麥美娟接受工聯會議員鄧家彪嘅網台節目訪問，大談當年做委任區議員經歷，仲公開畢業舊相。1993年，麥美娟以22歲之齡獲委任為葵青區議員，佢憶述大學時喺區內參與青年活動、擔任青年大使，當年剛考完大學畢業試，由於參與社區服務，9月隨即獲委任為區議員。佢話擔任區議員約一年後，認為地區服務有意思，咁啱獲新華社委任為區事顧問，於是覺得「唔好停」，轉循直選連任議員，直至2019年。
麥美娟又話，區會改制新制度由民政專員擔任區議會主席，但唔係由專員一人「說了算」，背後有公務員團隊支持。佢仲話，政府公務員內部文件紀錄清晰，專員就算換人都會做好交接，反指𠵱家區議會主席唔會留低筆記畀繼任人，認為將來工作延續性更強。
麥又大讚委任議員有貢獻，提到當時部分全區性嘅工作直選議員唔會做，例如協助推廣社區會堂，「我做委任區議員時，我就捱義氣做全區性嘅嘢」。佢話過去舉行千人盆菜宴，具工商背景嘅委任議員會幫手尋求支持，具物流背景嘅委任議員協助處理區內塞車問題，強調委任議員有其功能。