以前仲係香港住嘅時候,因為地方細嘅關係,基本上冇咩機會可以接觸到Roadtrip呢樣野。至從移民左去加拿大,一直都好想試下一次公路旅行,但因為平時返工冇咩機會拎到假期可以去到Roadtrip。最近我決定轉工作,襯未開始返新工,終於計劃左去一次加拿大東部城市嘅Roadtrip。
我同朋友由多倫多出發,揸車途經加拿大嘅渥太華,去到加拿大法語省份魁北克省嘅Montreal同埋Quebec City,嚟一場充滿古城歷史同歐洲風情嘅國內公路旅行。
渥太華位於安省同魁北克省嘅交界,係加拿大嘅首都。好多嘅政府機構都坐落係渥太華,例如國會山莊同埋麗都廳(總督府),另外仲有眾多嘅博物館。由多倫多揸車出發到渥太華,大約需要4個鐘嘅時間。中途可以係Kingston短暫休息,由於我哋出發嘅時候仲係楓葉嘅季節,所以沿途都睇到好多嘅楓葉風景。
如果係渥太華揸車嘅朋友,可以注意返大部份景點都位於市中心,同多倫多嘅Downtown一樣,喺辦公時間喺市中心泊車都幾難。渥太華都有完善嘅公共交通系統,例如地下鐵路等等,都好容易去到唔同嘅景點。
渥太華位於加拿大安大略省同埋魁北克省嘅邊界城市,只要過一條河就可以過到去隔離嘅省份,兩個省份嘅文化同特色都好唔同,如果去渥太華旅行都可以感受下渥太華首都圈兩邊省份嘅分明。
渥太華嘅景點並唔係太多,如果計劃緊Roadtrip嘅朋友,可以預留一兩日留喺渥太華,再出發去其他城市。
creator/ 便當 @bbbbento.ca
關注我們:
👉 Facebook: https://www.facebook.com/Denzity.io
👉 Instagram: https://www.instagram.com/denzity.io/
👉 LinkedIn: https://www.linkedin.com/company/denzity
# 免責聲明