【深宮計．專訪】劉心悠不愛做女神：我長短腳大細眼唔Perfect！

「女神」劉心悠其實不喜歡「女神」二字。

「其實就算女神都要去廁所㗎！」她一臉認真的說。

到底何時開始，「女神」二字必然是高貴優雅，絕不嗱喳？「女神」一詞，源自於古時對女性神祉的稱呼，隨年月變遷，「女神」獲凡人賦予更多意義，漸漸變成現化代人對「完美女性」的標準，來到今天更甚，「女神」橫行，卻過度濫用，「性感女神」、「仙氣女神」、「活潑女神」、「運動女神」等等，10隻手指數不完，而且是瘦人專用，難怪黃偉文要寫《女神》一曲予鄭欣宜反擊之。

劉心悠有甜美笑容，談吐得體大方又熱愛運動，所以她會稱為「女神」其實亦都無可厚非，所以當記者見到劉心悠的時候，最想問的問題就是：你點樣睇「女神」這個稱呼。

劉心悠直言自己長短腳大細眼

甲之熊掌，乙之砒霜。外人眼中，「女神」是對劉心悠的讚美，但對她而言，只是一個負擔：「畀人標籤叫『女神』，會唔會未必咁好呢？其實就算女神都要去廁所㗎，女神都有人性化一面，我覺得太神化一個人好似唔係太真實，咁我係一個好真實嘅人，劉心悠我有好多好負面嘅嘢，我又有好多缺憾。我腳係長短腳，我係大細眼，其實我有好多好多，即係唔係叫perfect囉。所以我覺得成日俾人Label（標籤）呢樣嘢，入咗腦之後人哋就會覺得：『吓，原來你會放屁㗎？』你明唔明？其實我係個人嚟㗎，我驚呢一個叫法會變咗係洗腦。」

大家可能會認為，不叫「女神」，「BB」又如何？惟心悠也不喜歡「心悠BB」這個稱呼。「可唔可以唔用BB兩個字呢？BB係一個好cute嘅一個稱號，其實已經好多年㗎啦，BB都應該長大咗。」

關於跑步，心悠想說的其實是......

萬事皆有因，劉心悠獲封「女神」，其中一個原因是她熱愛運動，素顏跑馬拉松更是無敵，她說連續跑了10年馬拉松，源於當初一位朋友邀請：「我嗰時連馬拉松係咩意思都唔知，去之前先知原來要練習嘅。」

相比起馬拉松可以「呃Like」，可以證明自己，她更喜歡純粹跑步這回事：「我唔係鍾意馬拉松，我係鍾意跑步，馬拉松只係其中一種表達跑步嘅方法，但係鍾意跑步又唔一定要跑馬拉松，馬拉松只不過係好似一個考驗自己嘅成果。我仲記得跑完第一年馬拉松之後，我就講話：『我要儲埋100公里，就分10次。』我未必鍾意成個跑步嘅概念，但係我鍾意自己可以選擇，一個人去做一件事，我可以選擇點樣去做呢件事。其實跑步同訓練跑步係唔同嘅嘢，訓練跑步你係需要公式化，要迫自己一圈跑幾耐，係一個訓練，但係跑步就係人都可以跑。我就鍾意不受限制咁去跑步多。」

Special Thanks :
Wardrobe：N12H
Hair ：Eric Chow@Xenter
Make up: Rainbow Chung @ Annie G.Chan Make-up Centre