今年唔經唔覺又踏入左第二季，係今年情況真係艱難，唔單止營商艱難，投資環境都一樣艱難，今年整體嘅投資情況，頭三個月內，你要搵到會上升嘅類別，真係有啲難度。
睇返各個類別表現圖，年初至三月底嘅表現，港股類別、中國股票或大中華股票類別，跌幅都超過10%以上。好多人有投資既美國股票類別同埋歐洲股票類別跌幅就有7%到8%左右。見到呢個表現圖，我哋都可以想像到強積金嘅表現應該血流成河。
係依個咁慘烈既時候，竟然網上有朋友私底下同我哋講話，佢今年嘅強積金回報有接近10%，咁犀利嘅，我哋就追問佢究竟點樣樣做到啦？佢就話佢今年內做咗兩次轉換。我哋再追問，佢就咁答我哋，「if you are good at something, never do it for free」。呢位師兄就答咗我哋一個咁玄嘅答案，大家又估唔估到佢今年其實做咗邊兩個操作，會得到咁好嘅表現呢？
其他朋友，你哋係今年嘅投資表現又如何呢，歡迎留言或者私信俾我哋，大家探討下。
果位高人師兄唔講佢點操作，但強積金上一般大眾點操作，我哋其實可以見到。大家仲記唔記得我哋有幅現金流嘅圖呢，呢幅圖講咗大家喺過去嘅時間點樣操作自己嘅MPF，賣出咗啲乜，轉入咗啲乜。之前講過，呢幅圖啲數據係我哋自己收集，自己分析。一般係坊間，作為個人投資者或散戶，你想買呢類嘅分析都搵唔到呀。係咪好珍貴呢。
睇返現金流，今年大家好像集中係一個操作上面，睇吓幅圖就知，大家只係撈底港股。個個都走去轉入港股度，不論主動型或者指數追踪嘅港股，都有大量資金流入。反而其他股票類別相對來講就比較少啦。除咗因為大家都有比較強烈嘅home bias之外，相信喺過去呢段時間俄烏戰爭爆發，歐洲變咗主要戰場，大家對投資外國股市都會有一定戒心。反而大家對港股嘅心態就係口中說不，但越低就越吸。
雖然越跌越吸，但你係今年第一季度嘅得失，就係決定於你嘅港股係乜嘢時間吸。
喺圖我哋可以見到頭十大吸金最多嘅港股。大家冇估錯，吸金最強嘅就係宏利嘅香港股票基金同埋永明彩虹嘅香港股票基金，宏利係有兩隻基金係頭五大吸金基金，佢隻恆指追蹤基金都在頭五大吸金基金內。
比較估唔到嘅就係匯豐嘅恆指基金同埋中銀保誠嘅香港股票基金都係頭五大吸金港股基金內。
喺度提一提大家，匯豐嘅強積金計劃內，係冇一隻主動型嘅純港股基金，佢嘅香港股票基金類別內有一隻追蹤恒生指數基金，同埋一隻中港股票基金。所以喺匯豐計劃內如果想撈底港股，好多人都走咗去買恒生指數基金。我哋睇十大吸金港股基金都見到呢個現象。各個投資者好明顯係想撈底港股。你叫做中港，就唔係大家心中想撈既。雖然都會吸到金，但就冇單純港股既吸到咁多。
同匯豐同一情況嘅仲有AIA友邦。喺友邦強積金計劃內，都係冇港股主動型，靠揀選股票來操作嘅基金，佢計劃內只有一隻中港基金，依隻基金係會買其他指數基金來投資。可能都係因為佢嘅投資風格或者佢個基金名稱嘅關係，呢隻中港基金喺今個階段嘅港股基金吸金比賽之中比較落後左啲啦。
由頭五大吸金港股類基金，我哋可以睇到成個強積金平台入面邊個計劃吸金比較多。
睇返2022年3月底各個計劃嘅市佔率，排名冇變到，但有幾個位要留意，第一樣係宏利越黎越拋離匯豐，就算係將匯豐同恒生加埋一齊，都同宏利越差越遠。第二樣要留意嘅係，永明嘅彩虹計劃嘅市場佔有率開始越黎越拋離友邦。其實依兩點都可以從各個計劃嘅資金流見到。就咁睇似黎緊大家可以見到宏利同永明遠遠拋離其他計劃，但匯豐都唔差，咁匯豐既資金流係咪真係好咗好多呢？
之前我哋同大家都講過匯豐近排嘅廣告方向同埋目標客戶有啲改變，佢銀行上嘅政策銷售改變，對強積金嘅現金流有冇影響呢？呢個仲要睇長啲時間，但睇今年年初到三月底嘅強積金資金流，佢嘅資金都冇再大幅流出。
資金流嘅多少其實要同計劃本身市佔率嘅大小來作比較，大家喺度可以見到宏利同永明嘅資金流佔比對比佢而家計劃的市佔率係高好多，即係話佢現金流入，係會慢慢令到成個計劃市佔率越來越大，反觀你睇吓其他例如匯豐友邦，佢嘅資金流嘅佔比，比起佢個計劃市佔率係低咗，即係流入嘅錢唔足以保住佢依家市佔率，即係隨着時間越嚟越過，佢市佔率係會下降。所以如果係咁講，匯豐又好，友邦又好，雖然數值上仲係有唔錯嘅現金流入，但長遠落去只會令到佢嘅市佔率，越縮越細。
如果有啲計劃，喺現時都已經出現資金流唔足以保持市佔率嘅情況，咁到咗積金易平台，eMPF推出後，慢慢供款人轉換計劃越嚟越容易，強積金市佔率歸邊嘅情況只會越嚟越嚴重。我哋又留心睇吓黎緊供應商會唔會推出乜嘢嚟吸引一下強積金嘅供款人啦。
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
