明星買手信︱王大陸孖蔡卓宜行北京景點拍拖斷正

台灣男星王大陸今年5月被斷正同失婚馬來西亞女星蔡卓宜當街激咀，令二人戀情曝光，不過佢哋就好有默契封口唔回應，仲試過畀好友柯震東笑佢咀女搞到上10億熱搜添！點估到佢哋兩個保護愛苗都再次被偶遇，有網友尋日（24日）就上載多張偷拍相，表示喺北京雍和宮見到佢哋拍拖，王大陸一身黑衣打扮，戴晒黑色口罩遮靚仔樣，似乎有心唔想被認出。佢身邊嘅蔡卓宜就收起火辣身材，長髮披肩配橙色Tee，又Young又低調，佢同樣戴上口罩。

網友晒完相之後，竟然有其他網友留言話都喺同一地點見到佢兩個，睇嚟佢哋嘅「易容術」爭咁啲，好在網友都留言大讚佢哋好襯，仲話估唔到明星都會去景點嘅禮品部購物，夠晒貼地，仲大讚王大陸陪外國女友買手信，係絕世好男友咁話！