【viu】動作電影《九龍城寨之圍城》截至噚日上映短短4日，票房已破1,500萬，真係威豬！而噚日林峯、胡子彤、伍允龍、張文傑等團隊都冒紅雨謝票，喺其中一場竟然有花生食喎！
事緣伍允龍同一名大叔觀眾示範咩係寸勁，點知大叔等伍允龍面向觀眾講緊嘢時，就忽然偷襲踢伍允龍一腳，然後再轉身起飛腳補多飛攻擊伍下身。隔咗一陣，大叔同伍允龍握手期間，再忽然用上半身加右邊膊頭嘅力推伍允龍落地。但真係要俾Like伍允龍，佢施施然起返身仲笑笑口自嘲：「我真係唔識氣功㗎喎！」
事後伍允龍大方回應：「我冇事，只係冇防備俾人推低咗！明白呢位觀眾睇得太投入，以為我真係王九，今次演技真係有突破。」真漢子呀！另外電影公司亦發放未曝光嘅劇照，包括廖子妤飾演嘅魚檔女工、引發九龍城寨大戰嘅蔡思韵，仲有俾面具四子打到飛起嘅「肆毒警」朱栢康，快啲入嚟睇現場實況片啦！
