傳《卡拉屋企》將於3月重播 劇集瘋狂搞笑好經典

如果要講經典處境喜劇，《卡拉屋企》相信係其中之一。近日有消息指無綫凌晨時段播完《如懿傳》之後，將原本播《皆大歡喜》嘅時段重播《卡拉屋企》。一共227集嘅《卡拉屋企》以「白頭佬」黃家景（楚原飾）退休警務人員，同佢屋企人每日所發生的事情為主，劇情輕鬆搞笑又發放正能量，深得觀眾喜愛，今日就同大家數下劇集嘅經典啦！

笑匠雲集
劇集由楚原（飾演「白頭佬」黃家景）、盧宛茵（飾演「肥媽」廖仲好）、李婉華（飾演「蒂姐」黃蒂）、黎海珊（飾演「失魂菲」黃菲）、鄭敬基（飾演「發記」黃發）、吳鎮宇（飾演「泰臣」廖通泰）、秦煌（飾演「肥仔德」廖仲德）及歐陽震華（飾演劉青山）等人主演，佢哋個個性格鮮明又充滿喜感，好似蒂姐嘅熱情爽朗、失魂菲嘅橫衝直撞及泰臣嘅傻更更及發記嘅古靈精怪等等。雖然劇集開頭反應一般，不過中段開始劇集改以瘋狂喜劇模式，劇情越嚟越胡鬧、對白及角色都越嚟越癲，成功吸引唔少觀眾坐定定收睇。

主題曲夠地道
劇集喺1991年首播，主題曲《香港新姿態》旋律入腦及歌詞夠抵死嘅關係，至今仍有唔少觀眾可以唱晒成首。主題曲由鄭敬基作曲，搵嚟劇中演員合唱。除咗「喂，夠鐘喇，睇電視，睇吓今集講乜先，講乜先。」之外，歌詞中嘅「香港地，有幾多專制禁忌； 比心機，要搵錢應記有限期 。香港地，要表態直言要上街；保守派，開通派香港新姿態…」都好經典，完美道出當時香港嘅實況。

沙皮狗Popeye勁搶鏡
喺劇中飾演泰臣嘅吳鎮宇，當時帶埋自己隻狗Popeye同場演出，Popeye非常搶鏡，觀眾反應熱烈。之後，Popeye戲份越嚟越重，劇組仲將佢人格化，有旁白配埋音。 去到今時今日，唔少人都好懷念Popeye。

劇集即將重播，有興趣嘅記得到時收睇啦！