5個一定要知的職場e-mail守則！

相信好多人返到office，第一時間一定係check吓公司e-mail個inbox，有時放完假返去可能仲會有N封unread嘅e-mail等住要處理。喺工作上，電郵實在係非常重要嘅工具，而亂咁send e-mail、覆錯嘢嘅話，好有可能會影響同事同上司對你嘅印象，咁究竟有咩要特別注意？

1.禮貌回覆

所有工作上嘅電郵，最好即日之內回覆，以免令人覺你做嘢無效率。有時同事出個e-mail要你做嘢或者通知你某啲嘢，你可能覺得只要執行咗就ok，無必要回覆，但簡單覆一句「Noted with thanks.」都好重要（尤其是上司send出嚟嘅e-mail），可以俾人你有交帶嘅印象，亦可以避免人哋要再追問你有無收到咁麻煩。




2.保留發送紀錄

唔好以為電郵send咗俾人就搞掂，自己個sent box可以隨時清理。職場上點都要保護自己，萬一對口同事反口話無收過你通知，你嘅傳送紀錄會係一個好證據。

3.別作私人用途

好多人貪方便用公司e-mail account處理私人嘢，呢個絕對係職場大忌 ！無論係大公司定細公司，內部一定有辦法check到你嘅e-mail紀錄，有聽聞過部分公司真係會「監控」員工嘅電郵。雖則呢樣嘢未必發生喺你身上，但公事同私事，都係分清楚啲好。

4.重要事要cc相關人士

發送電郵一定係善用To同Cc功能，一啲重要事，為咗保護自己，除咗to直接同呢件有關嘅同事之外，亦應該cc （抄送）俾大家嘅直屬上司和其他同事，等大家都知道件事，亦可以俾到「無形壓力」對方要處理好件事。不過，要切記唔好係又cc唔係又cc，芝麻綠豆小事都cc晒俾全村人，大家只會覺得你煩同奇怪。

5.善用bcc

有時工作上需要send mass e-mail俾唔同嘅客，千祈唔好將全世界嘅e-mail address都放喺to嗰欄！筆者久不久都會收到呢類e-mail，因為全部人都會睇到邊個有份收到呢封電郵，感覺好似俾人洩露咗私隱咁，亦會覺得唔太尊重。Send呢類e-mail嘅時候應該善用bcc（密件抄送）嘅功能。當然，如果係重要嘅客戶，個別send e-mail俾佢哋會顯得更加尊重同有禮貌。