【黃庭桄專欄】《12怪盜》有幾怪？

實在聽到太多劣評，狂踩MIRROR主演的電影《12怪盜》，電影網站的評分低至二點九分，看來是爛片之王。
　　
先利申，我絕對不是鏡粉，也沒有任何反感。出於好奇，上畫個多星期後，我忍不住撥出九十六分鐘，睇吓套戲有幾爛先。
　　
畢竟鏡粉是有高消費力，她們隨時可以包起電車或商場外牆的幾層樓高屏幕，為偶像慶祝生日。
　　
今次導演相當聰明，在鏡頭運用方面，完全是為了令鏡粉尖叫，片中有大量MIRROR的逐一大特寫，又有成團十二人的型仔海報式畫面，鏡粉絕對收貨，而且相信她們會入幾次場一看再看。
　　
這齣電影根本不是拍給普羅觀眾欣賞的，十二個主角各有看家本領，不會因為某些人比較紅而側重，戲分平均，節奏亦算明快。劇情也有笑點，例如姜濤的職員檔案照片，竟用回他當年的真身肥仔樣，大玩自嘲，都幾好笑。
　　
當Lokman和Anson Lo闖入展覽廳，穿過紅外線防護網時，又讓兩人無厘頭大展舞技，鏡粉一定大感滿足。
　　
但對我而言，劇本是鬆散的，角色描繪是浮面的，滅蚊燈和右翼雞的情節是膠的，壓軸的救人情節，是虎頭蛇尾草草收場的，所有保安員連警棍都冇一支，拳腳功夫完全不堪一擊，十二鏡仔忽然如李小龍上身，未免太過誇張兒戲。
　　
如果你不是鏡粉，可以不用入場，因為你會問，到底睇咗啲乜嘢？如果你視其中一個鏡仔為偶像，你可以至少睇三次，因為真係拍得夠晒有型。如果你是影迷，希望香港電影能夠大放異彩，請大力鞭撻，讓有潛質的十二子，不要再拍爛片，好好珍惜羽毛。

加拿大星島WhatsApp報料熱線：(437)428-9394

下載「星島新聞(加拿大版)」App，隨時看到最新最快新聞：
iPhone：https://apple.co/2IBi812
Android：https://bit.ly/2Pe8anu

訂閱加拿大星島網電郵快訊，每天可收到最快新聞資訊電郵： https://www.singtao.ca/subscribe/singtao.php

>>>訂閱CCUE YouTube 頻道，查看更多吃喝玩樂、生活資訊影片。