香港人好多人都鍾意買股票，炒股當投資。原來強積金都有得炒，但唔係你自己炒，係有人幫你炒。海通強積金fund size 細，基金換手率高，持股數目少而集中，這麼通通都係股票炒家的特色。
係香港咁多個強積金計劃入面，海通MPF絕對係一個比較另類既計劃。
佢係咁多個強積金計劃入面資產總值最細，成個計劃得7隻強積金成份基金，加埋總值得5億幾6億左右，佔整個mpf市場不夠0.6%。大家可以比較一下，我哋好熟悉既盈富基金，佢既市值就933億港幣，咁大家係咪即刻對海通mpf的大細有返個感覺呢。
個計劃唔單止size細，供款人數目都好少！根據資料顯示2019年時個計劃既戶口數目少於7000！你要知道強積金戶口總共有成千萬個，如果你咁都發現到你身邊有人係用海通mpf，咁你真係同佢好有緣。
海通mpf資產咁細，又咁少人買，點解我哋又會特別提及佢呢？因為佢唔係好似一啲供應商咁，只做貨架咁賣其他人既基金，海通係有自己管理自己既基金，仲要用不一樣既炒股投資方式，所以得出不一樣既投資表現。
基金類別方面
海通強積金資產淨值最細，而且得7隻基金，當中包括法例規定一定要有既保守基金，同埋2隻懶人基金。所以實際上佢得4隻基金係自己想整既，分別係：港股基金，亞太基金，環球股票基金同韓國基金。
無錯，佢係有一隻韓國基金，主要買韓國股票，而這隻亦都係成個mpf市場中唯一一隻韓國基金。雖然韓國基金唔係好多人買，但都可以見到海通知自己細，所以同人哋鬥多一定唔得，所以求下創新，做下啲人地無既野。
海通既特別之處，你比較下佢同對手就見到，大家睇下資產淨值第2細既AMTD就明白。AMTD 既強積金計劃雖然有成16隻強積金成份基金比供款人揀，但佢選擇左只係做供應商既角色，佢所有既強積金基金都係搵其他基金公司幫手管理或買其他公司既基金，所以佢d基金表現都係大路表現，個情況似去d大型商場咁，入面d鋪頭都係果幾間連鎖店。
其實市面上都有唔少供應商係賣其他公司既基金，所以大家既投資回報好接近，這個情況在強積金界內好普遍，一般供款人睇住強積金供應商個名去買，但實際上d供款一層一層咁最後搵左邊個投資都唔知。
投資方面
海通特別之處，不單體現在海通的基金類別，也體現在它的投資風格。海通選擇唔做貨架賣人地貨來賺差價，投資方面由海通自己做返。海通既強積金基金投資風格一直係炒家風格，依樣由佢隻港股基金同恒生指數歷年表現比較中都可以睇到，
海通港股基金一直都比較大上大落，升又升得多過指數，跌又跌得多。投資風格上，佢既持倉都比較集中， 如港股持倉頭5位，已經佔40%，當中3隻為科技股，佔25%，而睇返港股基金過去既持倉，一般持股數目都少於30隻，好似它2019年6月底時的持倉股數為28隻，但另外有12隻股係持倉不夠一年，即在一年內買左，又賣晒。
如果我哋睇一睇佢隻港股基金既換手率，佢既雙邊換手率可以到200%一年，即隻基金係一年內等於賣晒所有持倉再賣晒。咁樣既基金管理方法，一般大行係會接受唔到，因為衡量各種風險，一般要求一隻基金最少都要有50-60隻股票持倉，有d大d既基金，可以成百隻股票，一年換手率又唔可以太高，一般係一年換30-40%貨，太多就會有各個監管既部門來警告你，因為大行好注重唔可以炒賣為主。所以海通咁樣既基金管理方法，可能係海通先可以有。
環球分散基金並不分散
唔單止港股基金，海通隻環球分散基金都顯露出獨有既海通炒家投資風格。公開文件睇到，佢隻環球分散基金並不分散，截至2020年6月時，佢基本上只係投資左係2個國家，美國同日本。美國佔左一半，日本佔左4成。 講返一般環球股票基金的國家分佈，都會跟參考指數的國家分佈差唔多，即係最多會係美國，之後係歐洲，亞洲，再之後先係日本，通常日本佔比大約只係10%左右。所以海通環球基金既國家分佈係同指數好大分別，差唔多完全無歐洲同亞洲。
海通懶人基金
海通投資的基金經理夠膽大幅偏離指數，佢既風險管理部門又畀佢咁做，所以令到海通d基金表現chok過坐過山車。
海通既懶人基金都流露住炒家既氣質。今年頭8個月，海通dis（懶人基金）表現相當標青，dis入面兩個組成部分caf同a65f都好突出，事關佢哋隻環球分散基金投資表現好，而佢哋既dis係直接買返自己既環球股票基金同環球債券基金。
市面上既懶人基金既管理方法，因為考慮收費同條例要求，一般都會採取同指數好接近嘅方法來管理。海通隻環球股票的國家分佈同指數咁唔同，所以同其他既懶人基金表現就好大分別了。比返d數字參考，今年1-8月懶人基金入面既caf（core accumulation fund）回報最高係海通既9.65%，最低係恆生匯豐既4.81%。
延伸閱讀
想提早退休? 想提高每月的被動收入? 有沒有回穩陣的收息股?
數以百萬計的投資者正運用股息為自己和家人創造持續現金流收入，累積財富。
您想成為其中的一份子嗎？
我們撰寫的《必須收藏的收息股投資指南》電子書就會分享獨特的收息股選股模型，並用實例教您挑選出真正可長期持續派息的收息股及揭示必要避開的收息「陷阱」。
要知道更多打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
