【Now財經台】日本「春鬥」初步結果上周五(15日)出爐，當地打工仔今年平均加薪5.28%，加幅係近33年最大，為日本央行加息提供更強理據，日央行今日(18日)展開一連兩日議息會議，有望結束實施咗8年嘅負利率政策，利率將由現時負0.1厘，調高至介乎零至0.1厘，但會維持買債機制，反映日央行想維持寬鬆金融環境，意味未必會取消債券孳息率曲線控制(YCC)政策，會唔會對日圓、日股，以至環球資產市場帶嚟好大震盪？
星展銀行(香港)豐盛私人客戶執行董事鄧威信指，消息傳出後，市場的確有啲動盪，推高日圓及令日股出現調整，但市場消化咗呢啲消息後，日圓隨即轉弱，因為市場認為日本唔會步入加息周期，即使調整政策亦會維持非常寬鬆嘅貨幣政策，市場亦估計日央行可能會取消YCC，所以反應相對冷靜。Wilson又話，除非日央行有出乎預期嘅大動作，否則，市場暫時都會較穩定。
