„ის პროცესები, რაც ახლა დასავლეთის დემოკრატიაში მიმდინარეობს, ძალიან ემსგავსება რომში მომხდარ მოვლენებს, ზუსტად ასე დაეცა რომის იმპერია“ - ლეგენდარული ფრენსის ფორდ კოპოლა ახალი ფილმით დაბრუნდა. „იმედის“ რეპორტაჟი კანიდან

ფრენსის ფორდ კოპოლას პოლიტიკური განცხადებები ამერიკაზე, ახალი ფილმის პრემიერა და კრიტიკოსების შეფასებები. ფილმი, რომელზეც ცოცხალი ლეგენდა 40 წლის განმავლობაში მუშაობდა - ეს თემა კანის კინოფესტივალიდან „იმედის დღის“ ეთერში მარიკა ბაკურაძემ შეაჯამა. ის სწორედ კანში, საკონფერენციო დარბაზში იმყოფებოდა, სადაც ფრენსის ფორდ კოპოლამ ფილმის შესახებ ისაუბრა.

ფილმი „მეგალოპოლისი“, რომელშიც მთავრ როლს ადამ დრაივერი ასრულებს, სამეცნიერო ფანტასტიკაა. ის მოგვითხრობს მეცნიერსა და ნობელის პრემიის ლაურეატზე, რომელიც იწყებს სრულიად ახალი სამყაროს შექმნას ხალხისთვის, ხალხის სახელით.

მარიკა ბაკურაძე „იმედისთვის“ მომზადებულ რეპორტაჟში ამბობს, რომ ფილმში ასახულია 40 წლის განმავლობაში დაგროვებული შეკითხვები და ფიქრები, რაც რეჟისორმა მაყურებელს გაუზიარა. ფილმში წარმოდგენილია პარალელი დღევანდელ აშშ-სა და რომის იმპერიას შორის. სწორედ რომის ნგრევას ადარებს კოპოლა აშშ-ის დღევანდელ მდგომარეობას. ფილმში ნიუ-იორკს - ნიუ-რომი ჰქვია, პერსონაჟებს კი - ცეზარი და სხვა რომაული სახელები, სცენებში გლადიატორები მონაწილეობენ და ყველაფერი მიდის ერთ „დიდ დასასრულამდე“.

„როდესაც წლების წინ ვთქვი, რომ ფილმის გადაღება მინდოდა რომაული იმპერიის შესახებ, რომელიც თანამედროვე აშშ-ში განხორციელდებოდა, ადამიანებმა მკითხეს - რატომ? ჩემი პასუხია: აშშ დაფუძნებულია რომის იმპერიის იდეოლოგიაზე - რესპუბლიკა სენატითა და რომაული სამთავრობო სისტემით. ჩვენ ქალაქებიც კი რომის მსგავსად ავაშენეთ, რაც სიგიჟეა. როდესაც ამ ფილმის გადაღების იდეა გამიჩნდა, ვერც კი წარმოვიდგენდი, რომ დღევანდელი პოლიტიკა მას ასეთ რელევანტურს გახდიდა. ის პროცესები, რაც ახლა დასავლეთის დემოკრატიაში მიმდინარეობს, ძალიან ემსგავსება რომში მომხდარ მოვლენებს. ზუსტად ასე დაეცა რომის იმპერია ასწლეულების წინ. ჩვენმა პოლიტიკამ მიგვიყვანა იქამდე, რომ შესაძლოა ჩვენი რესპუბლიკა დავკარგოთ. ხელოვანების როლი მდგომარეობს იმაში, რომ გააშუქოს თანამედროვე ცხოვრება და რეალობას სინათლე მოჰფინოს. ახლა დონალდ ტრამპი ქვეყანას არ მართავს, მაგრამ მსოფლიოში ახალი ტენდენციაა, ასე ვიტყოდი, ფაშისტური ტენდენცია. ასეთი ნეოფაშისტური პოლიტიკა ძალიან საშიშია. არ მადარდებს ფული. რომ არა რისკი, არ იქნებოდა ეს ყველაფერი. ასევე ვრისკავ ფილმებისთვისაც“, - განაცხადა კოპოლამ პრესკონფერენციაზე.

ფილმის შესახებ რეცენზიები უკვე გამოქვეყნდა. კრიტიკოსები წერენ, რომ ფილმმა მოლოდინები არ გაამართლა და ბევრმა ქვეყანამ მის შესყიდვაზე უარი განაცხადა.