أحمد حاتم عن انفصاله بعد زواج 3 سنوات: «كنت ظالم»
كشف الفنان المصري أحمد حاتم، عن العديد من التفاصيل والأسرار في حياته، ومن بينها الطلاق بعد زواج دام ثلاث سنوات.
وقال أحمد حاتم خلال برنامج «AB talks»، مع الإعلامي الإماراتي أنس بوخش، "تزوجت لمدة ثلاث سنوات، وتعلمت بعد طلاقي أن الإنسان ممكن يبقى أحسن وممكن يتغير وممكن يبقى أوحش".
وأضاف حاتم: " أنا كنت في نسخة مش حلوة مني وكنت شخص ممكن أكون ظالم حتى لو ده مش باين بس دي حقيقة الأمر، الطرف اللي معايا مكنش مبسوط ودي مش عادتي".
وتحدث حاتم عن دور المرأة فقال: "أنا بشوف أن الست هي السبب في كل حاجة في حياة الراجل".
وقال حاتم إنه لا ينزعج من إحساس الوحدة ولكنه لا يحب المكوث به فترة طويلة، مضيفًا: "أنا عايز أعيش حياة بسيطة ظريفة بس ده مبيتحققش، فأنا عايز أعرف أنا مطلوب مني حاجة ولا المشكلة فين، وأنا معشتش لوحدي غير بعد الطلاق ومكنتش أعرف أعيش لوحدي، ودلوقتي مقدرش أعيش مع حد".
وتحدث حاتم عن ابنه قائلاً: "الحاجة الوحيدة اللي كانت بالنسبة ليا معنديش القدرة أني أخبي مشاعري فيها هو ابني عزيز، وحسيت أني عايز أطلعه مع أنه لسه صغير، وعزيز هو السبب في كل حاجة وهو اللي خلاني أبقى شخص بضرب مشاوير كل يوم علشان أشوفه وأنا ممنون للإحساس ده وممنون لوجوده، وخلاني شخص مش أناني خالص من غير ما يعمل حاجة".
يذكر أن آخر أعمال أحمد حاتم فيلم «السرب»، الذي يعرض حاليًا في دور العرض السينمائية، ويشارك في بطولته عدد كبير من النجوم والنجمات، منهم: أحمد السقا، دياب، محمد ممدوح، صبا مبارك، نيللي كريم، أحمد حاتم، كريم فهمي، شريف منير، مصطفى فهمي، عمرو عبدالجليل، وغيرهم، والفيلم من تأليف عمر عبدالجليل، وإخراج أحمد نادر جلال.
