家族榮耀之繼承者｜張鳳妮激罕復出演羅嘉良二太狀態大勇 嫁大馬富商淡出娛樂圈多年

劇集《家族榮耀之繼承者》正熱播，除咗係佘詩曼和林峯第六次合作夠晒吸引，仲有唔少久未露面嘅面孔參與拍攝，包括羅嘉良和已淡出娛樂圈多年嘅張鳳妮。張鳳妮於劇中飾演羅嘉良二太太，受制於元配余安安，亦係羅子溢及梁靖琪母親；與羅子溢母子相認一幕更加突然飆淚，演技大爆發。

張鳳妮於1987年參選香港小姐競選，榮獲「最受佳麗歡迎獎」，1989年代表香港參選國際小姐獲得「最上鏡小姐」獎項。與TVB簽約後，曾出演《他來自江湖》、《天地男兒》、《餐餐有宋家》等多電視劇，1996年到馬來西亞拍劇期間認識到大馬富商傅仰峰，翌年二人結婚，張鳳妮淡出娛樂圈並定居大馬，先後誕下3名女兒，開展相夫教女生活，僅一年返兩、三次香港探望父母和與羅蘭、胡楓、梁葆貞、宣萱等舊朋友見面。

張鳳妮今次之所以參演《家族榮耀之繼承者》，全因監製梁家樹邀請，加上主景喺吉隆坡，所以就決定過一過戲癮，監製梁家樹亦透露張鳳妮鍾意今次嘅角色，相信佢都想要挑戰一下自己。張鳳妮於劇中無論外貌和身形狀態都非常好，完全唔覺絲毫歲月痕跡。對於凍齡心得，張鳳妮曾於接受媒體訪問時表示自己無好勤力做運動和節食，可能係喺個人無要求和壓力情況下，心境開朗，自然唔會太衰老。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！