香港婚後事丨陳自瑤開腔談離婚 龔慈恩唔拒抗再婚 黎諾懿煎牛扒用神秘醬料昇華貴價口感！

陳自瑤（Yoyo）、賴慰玲（Winki）、黎諾懿及羅天宇主持嘅TVB節目《香港婚後事》逢周四及周五晚十點半翡翠台播映，今晚播出第8集嘉賓龔慈恩（龔姐）。 今集探討主題係「離婚」，龔姐分享對夫婦離異嘅見解，認為「冰封三尺，非一日之寒」，有啲女性比較傳統啲，覺得仔女係佔咗自己生活一大部分，某一段時間完全忽略咗自己，將啲時間、精神、責任擺晒喺仔女身上，當某一日突然間醒咗，就會意識要有自己人生，令有番咁上下年紀嘅人有離婚嘅意識。 

《香港婚後事》今集嘉賓係龔慈恩，龔姐話唔抗拒再婚，仲話現階段需要個伴多啲。

Yoyo認為一段關係係雙方付出，「可能好想為小朋友保持一個美滿家庭，可能對方唔想，可能佢個心已經走咗，你格硬死𢱑都冇辦法，有啲嘢唔係一個人可以做到，呢啲情況就冇得選擇」， 諾懿亦分享指香港每年約有過萬宗離婚個案，而離婚手續日漸簡化。

Yoyo 分享對離婚嘅睇法。

Winki覺得「離婚」變得流行：「大家覺得（離婚）冇咁大件事，即係兩個人婚姻 （如果）出現咗問題，然後就（咪）離婚囉，唔去解決。」Winki續指近來香港出現移民潮，不少夫婦因移民衍生嘅問題而鬧離婚。問到龔姐搵到適合嘅人會唔會考慮再婚？龔姐坦言：「會嘅，我覺得現階段係需要伴多啲，再唔再婚係另一個問題，但我唔抗拒。」

天宇話自己細個似白老鼠，更宇嬲爆自己矮過細佬胡㻗。

單親家庭長大嘅天宇坦言仍然相信愛情，希望將來畀小朋友一個完整家庭。 天宇有一位同母異父嘅弟弟胡㻗，兩兄弟感情要好，天宇笑言自己係「白老鼠」：「我媽覺得呢個方式教仔唔係好掂，下個就會試用另一個方式，調整吓再做個好啲嘅出嚟。」天宇透露年輕時似受保護動物，媽媽對佢管教非常嚴格，連放學後都唔准出街打籃球，天宇笑言：「我好嬲呢樣嘢，我同細佬係唔同爸爸， 我爸爸高過細佬爸爸，但我細佬高過我半個頭，點解釋吖？真係好嬲呀！龔姐個仔咁高都係因為打籃球，我細佬去中學時期，我媽叫佢打多啲籃球，唔好似阿哥，細佬係成功嘅實驗品。」 

諾懿做「教煮」，只需要一個神秘醬料，就可以將幾十蚊嘅牛扒煎成幾百蚊 嘅味道，究竟係咩？

諾懿今集化身「教煮」指導天宇煎牛扒，只利用一樣神秘醬料，能將幾十元嘅牛扒煎成貴價口感，Winki試食完後果真傻傻分不清邊一塊先係貴價牛排，諾懿就話只要搽一搽呢個神秘醬料，再拎去煎就做到一塊去扒房先食到嘅香濃牛味道。

Winki 都分唔到邊塊先係高級牛扒！

此外，Winki亦分享在職媽媽嘅辛酸，更講到眼濕濕，佢大爆兩次喺啟德郵輪碼頭拍劇時，阿仔皆因故入醫院，令佢對啟德郵輪碼頭有陰影！今集繼續有「殘酷２選 1」，諾懿負責接受挑戰，面對「想做5億駙馬定天王巨星」呢條殘酷話題，又會點樣抉擇？

Winki 講起在職媽媽嘅辛酸時不禁眼濕濕。

《香港婚後事》逢周四及五晚十點半翡翠台播映