麥卡迪亞爆內幕：曼聯球員話我知新領隊係佢

曼聯近8場聯賽只得1勝，今季英超排名同得分都有機會打破歷史新低，領隊坦哈格帥位岌岌可危。前利物浦球星麥卡迪亞日前喺電視直播爆料，稱有曼聯球員向佢透露新領隊人選，英格蘭領隊修夫基就係「真命天子」。

現年52歲嘅愛爾蘭名將麥卡迪亞，喺直播比賽期間突然爆料：「上星期五我同一個曼聯球員傾過，我同佢住喺附近，我哋一齊傾季尾嘅情況，佢畀我感覺係唔覺得坦哈格會留低。事實上，我哋仲討論咗幾個適合執教曼聯嘅人選。」

另一主持開始追問人選，講到德國教頭杜曹，麥卡迪亞話：「佢微笑，但話唔係杜曹。」提到係咪摩連奴，麥卡迪亞直接話「唔係」；最後講到修夫基，麥卡迪亞表示：「冇錯，就係修夫基，球員肯定會知道領隊嘅去留，佢(曼聯球員)畀我感覺係修夫基已經搞掂，塵埃落定。」

修夫基同英格蘭足總嘅合約去到12月底完結，一直有傳佢帶埋今夏歐國盃決賽周後，就會離開英格蘭國家隊，而曼聯新老闆拉特克利夫視佢為新領隊嘅頭號人選。