東張西望懶人包︳何太被爆街市搵對象 否認煲湯落壯陽藥 自信何伯︰後生仔唔夠我嚟

《東張西望》繼續報導何伯何太嘅故事，最新一集去到二人相識嘅街市，搵知情街坊爆料。有檔主直言當時仲未係何太嘅何太，第一日擺檔已經周圍放聲氣想識男人！

《東張》去到何伯經常打躉嘅報紙檔，檔主陳生陳太話何伯心地好，對佢哋好好，而且為人疏爽，不時請人食飯，經常企喺報紙檔門口同人傾偈打發時間，每日都留6至8個鐘先返屋企。至於「何太」就係今年過年前出現，喺街市報紙檔對面擺臨時攤檔賣花膠海味，因而認識何伯。但係陳生陳太對「何太」印象麻麻，話佢開始擺檔嗰陣已經周圍同人講自己離婚五年兼有個仔18歲，第一日識何伯就問有冇男人介紹，甚至問陳太同何伯係咩關係，似係想「探料」。

陳生陳太看在眼裡心知有事，於是勸何伯小心啲。「點解呢個人會講自己呢啲嘢出嚟搵男人？」。而「何太」好快就出動「靚湯攻勢」，識咗何伯第二日就煲湯俾對方飲，之後仲日日焗花旗蔘、果皮水畀何伯，果然湊效。「日日都有一壺畀佢，跟住佢哋互相買飯食，同埋剝定個橙畀佢，剝晒皮㗎啦！」而何伯之後等埋「何太」收工，陳生陳太就知出事。「我哋唔係唔想佢好，有個女人照顧佢，我哋都唔知幾開心啦。但無奈我真係見到個女人擺明呃你，我都同佢講好多次，佢話『唔係啲咁樣嘅人』。」陳太直情話何太擺檔15天，佢就勸足何伯15天，甚至連半個街市嘅街坊都勸過何伯，話「小心啲，呢個女人唔簡單，可能呃錢㗎」、「點會嚟幾日就想做你老婆」。

陳生陳太最後都喺節目苦勸何伯「雖然我兩公婆唔係識你太耐，但日日都見到幾個鐘，你又當我哋好似啲仔女咁。我都唔想你為咗個女人搞到屋企咁。幾個仔女又唔係對你唔好，何必要搞到咁呢？……醒吓啦！」

「何太」雖然擺檔第一日就識到何伯，但原來同時仲「情挑」街市一位已婚髮型師，仲互加微信。髮型師都有接受《東張》訪問，對於何太佢直言「我唔係懵！睇人咁多，一睇佢講嘢就知佢釣緊魚」。

對於街坊嘅講法，何伯何太都有回應。被指同一班姊妹喺街市專吼阿伯，甚至煲湯落壯陽藥，何太否認咁做，話「我唔識呢啲嘢」、「我份人行得正企得正，去到邊我都光明正大」。而何伯就以自身狀況代為解答「我OK嘅，啲後生仔唔夠我嚟呀，假嘅咩？你睇我身體！」，佢又大讚「何太靚湯」令佢越飲越精神。

至於二人相識經過，「何太」係咪第一日就咁主動？何伯講法同報攤陳生陳太所講差唔多。「我嗰時喺隔籬買報紙，揸住啤酒同佢傾下偈，我同佢感情好，佢問我有冇男人介紹一個俾你，我話唔得喎！」。何太聽完補充「我問你有冇好男人，幫我留意一個，做老公嗰啲，我想搵個好老公」。何伯聽完，原來打算「自用」。「一係契女，老婆又得，唔係喇！我就留返自己用，做老婆，咁我就一句『做老婆，做我老婆』，我留返自己用」。

相識一日就決定「自用」，何伯話係一見鍾情「早就睇中佢，我一眼就鍾意咗佢」，亦唔介意何太主動。「佢急，啱我心水，嗰時我都唔夠膽，初初我主動追唔夠膽，佢有意思就最好啦」。何伯唔承認自己被戀愛沖昏頭腦，「我愛佢愛得啱嘅。有佢照顧我下半生，我就好開心。到時我剩咗啲錢，結咗婚留畀佢就啱嘅，留畀仔女冇用，冇幾耐就散晒」。係咪因為獨身多年太dry？何伯話前妻走咗九年未搵過女人。「感情到喇，緣份到喇，咁就鍾意咗佢。我哋由淺感情一路深落去，同佢結婚囉。」

至於被指暗交髮型師，何太承認有同對方互加微信，亦知道髮型師有家室。「因為我當時想開一間單剪，想同佢合作……想請教佢到底香港開單剪髮型屋需要咩證件」。