周揚青疑曾想嫁羅志祥　做唔成羅太決心梳起唔嫁

內地網紅周揚青早年因同台灣舞王羅志祥（小豬）「毀滅式分手」，而正式加入娛樂圈成為藝人，最近佢就出演內地真人騷《乘風2024》（又名《浪姐5》），佢到依家嘅一舉一動都被網友聯想起佢同小豬嘅戀情，睇嚟二人「關係」都難搣得甩。最近佢喺幕後花絮中被其他姐姐關心感情事，佢透露已經單身3年，目前唔想談戀愛只想專注工作，當中楊謹華追問：「你從來都沒有想要結婚嗎？」佢就回答：「我有想過要結婚，但就是沒有結，過去了那個時間點，就再也不想要結了。」一下子就決定婚都唔結，即被網友聯想到佢曾經想結婚嘅對象好可能就係羅志祥。

35歲嘅周揚青最知名嘅前任，就係佢同羅志祥曾談過9年馬拉松戀情。慘烈分手後，佢短暫同內地食品業富二代男友羅昊相戀，唯熱戀28日就分手收場；後來又曾同細佢10歲嘅男團偶像段星星爆緋聞，但被影到拍拖後見光死，所以先會令網友覺得佢本身係想嫁羅志祥。