獎門人感謝祭終極篇丨男嘉賓爭住對戰PE衫郭珮文 王祖藍稱為啜葉子楣等足40幾年

特備節目《獎門人感謝祭終極篇》將會喺今晚八點播出，而今集亦係本季《獎門人》嘅最後一集。除咗獎門人曾志偉率領歷屆獎老：錢嘉樂、林曉峰、阮兆祥、金剛、麥美恩、林秀怡同林正峰嚟個大晒冷外，嘉賓陣容一樣好有睇頭，當中有「獎門人身體健康」隊嘅苗僑偉、葉子楣、謝天華、黃翠如、陳山聰、洪天明、朱晨麗同梁競徽；「中年好聲音2」隊嘅古淖文、譚輝智、 顏米羔、陳俞霏、林若盈、陳蒨葶和王玥； 仲有「福祿壽訓練學院」隊嘅王祖藍、李思捷、陳懿德、郭珮文、林妍、陶大衛、彭建豪、趙頌宜、伍韻婷、林樂熙、莫家淦、黃建東、周百恩、陳柏曦、鄭詠謙、湯卓堅、趙亮昭、吳兆麟、劉倬昕、麥嘉欣、蔡景行、黃潤成、馮彥中、梁山山、關嘉敏、郭浩皇同葉泓聲。
今集大晒冷。
早年已坐擁「最強 Body」銜頭嘅葉子楣，原來係首次嚟到《獎門人》，佢一出場就撒嬌叫大家要對佢手下留情。喺首個遊戲「開心無敵啜乒乓」中，處女下海嘅葉子楣喺啜乒乓波時竟然忘情伸脷；而同樣有「最強Body」之稱嘅郭珮文，則貫徹天然呆本色慢動作啜乒乓，相當搞笑。
葉子楣喺啜乒乓波時忘情伸脷。
去到1對1對決時，一眾男嘉賓見到以PE衫亮相嘅郭珮文打頭陣上場時，即刻爭住出戰，呢個時候三哥苗僑偉就發揮隊長本色話自己嚟，不過輪到陳懿德上場時，大家就一面嫌棄。至於去到葉子楣上場時，同佢對啜嘅祖藍就開心咁話：「子楣姐，我等咗40幾年呀，就係等呢一刻！」
以PE衫亮相嘅郭珮文被男嘉賓搶住對戰。
嚟到「開心無敵私人醒」中，負傷上陣嘅翠如BB搶盡焦點，其中一題「心儀對象做啲咩你會完全冇 feel」，翠如BB接連講出：「推阿婆落山」、「推阿公落山」同「推阿妹落山」，令到睇唔過眼嘅祖藍話：「你究竟係跌親隻腳定跌親個腦呢？」
為咗贏，可以去到幾盡？
今集嘅「開心無敵爭櫈仔」堪稱《獎門人》史上最強， 40幾人一同上陣爭櫈仔，首個回合已經玩到人疊人，場面非常墟冚。之後「遊戲魔人」洪天明同陳蒨葶上演 1 對 1 決戰，陳蒨葶表現異常兇狠，獎門人都唔睇好洪天明可以贏，仲話陳蒨葶好鬼狼呀！而喺「開心無敵開口中」戰況同樣激烈，唔只眾嘉賓齊齊變Cream人，洪天明仔仔亦有落場玩埋一份，佢仲勁大膽向獎門人掟Cream！
天明仔好大膽。
呢集尾聲，獎門人同眾獎老齊齊分享感受，獎門人話：「呢 29 年好多謝大家一直支持我哋。」而麥美恩爆喊話：「好多謝獎門人，《獎門人》係影響咗全球華人，我都係其中一個，好多謝可以畀我參與呢個節目。」曾為獎老之一嘅祖藍亦感性表示：「勾起咗好多回憶，記得當初我嚟到《獎門人》時，我係完全唔識講嘢，獎門人當時係特登度咗形體題畀我，畀我一步一步進入呢個節目，好多謝獎門人。」
玩到人疊人。
今集節目除咗有大量感謝祭貨品會喺節目播出後於網購平台「鄰住買」開售外，觀眾喺收看節目期間，只要嘟一嘟螢幕上嘅 QR Code，就有機會搶到 10 萬封現金利是！
嚟到節目尾聲大家都好感性。嚟到節目尾聲大家都好感性。