菲爾科頓省兩粒扑錘　曼城締造英超4連霸

周日（19日）晚英超煞科日，曼城與阿仙奴喺爭標路上鬥到最後直路，「藍月亮」憑菲爾科頓梅開二度，喺主場以3比1擊敗「錘仔幫」韋斯咸，力壓阿仙奴奪冠，成為英超史上首支連續4季封王嘅球隊，認真威水。

賽前曼城領先阿仙奴2分，只要今場贏韋斯咸就肯定奪冠，佢哋一開波即有收穫，僅2分鐘菲爾科頓於禁區頂遠射靚波得手，極速打開紀錄，呢位連奪英格蘭足球先生同英超賽會最佳球員嘅「三獅」國腳，喺18分鐘再建一功，非常輕鬆。不過古達斯完半場施展倒掛破網，為韋斯咸追番1粒。

下半場曼城繼續控制戰局，58分鐘奇雲迪布尼策動攻勢，貝拿度施華於禁區邊回後，洛迪卡斯簡迪遠射建功，將比數拉開至3比1，最終曼城順利贏波，而另一邊廂阿仙奴喺王牌布卡約沙卡因傷倦勤下，喺主場以2比1反勝愛華頓，都阻唔到「藍月亮」史無前例嘅英超4連冠霸業。