【明報專訊】Affordable Art Fair Hong Kong 2024噚日起一連4日喺灣仔會展舉行，主打定價10萬元以下嘅「可負擔」藝術品。旅發局今次聯同大會一齊策展互動裝置藝術體驗《霓虹》，場內設舊式上海理髮廳，訪客可以免費體驗懷舊恤髮服務。至於行過隔離就係秘密酒吧，入面放咗12幅以香港街景為主題嘅插畫，仲有調酒師調製4款分別以蛋撻、奶茶、香片、菊花茶等港式味道雞尾酒。
《霓虹》由美籍台灣藝術家Jonathan Jay Lee及米芝蓮一星餐廳前首席侍酒師Kiyoshi Hoshimi-Caines共同創作，兩人細個跟父母工作來港而認識。《霓虹》創作意念來自掛滿霓虹招牌嘅深水埗小巷，表面睇落係一間七八十年代舊式上海理髮廳，但穿過隱藏入口就會發現內藏秘密酒吧，而酒吧內嘅12幅插畫就取材自唐樓、傳統麵檔及霓虹招牌等舊區元素。
旅發局希望透過《霓虹》，令旅客感官體驗香港嘅獨特風貌，觀展後再「城市漫步」作另類深度遊。今年展覽有97間本地及國際參展單位，入場票價215至374元。
相關字詞﹕盛事 旅發局 Affordable Art Fair