【Now Sports】阿士東維拉2018/19年仲踢緊英冠附加賽,估唔到短短幾年可以攞到前4。好似發夢一樣咁神奇。
撰文:Kidd
回想艾馬利第一日上任就講目標係帶領維拉打入歐聯並為維拉奪取冠軍,我估嗰時好多人都應該會覺得佢不切實際,踢歐聯會唔會太大想頭?始終英超競爭性比較大,要奪得前4係一件唔容易嘅事,加上謝拉特令到維拉水深火熱,所以絕對冇乜人會諗做得到。
但經過上任後,佢為球隊作出調整後,球隊表現脫胎換骨,更由護級份子搖身一變成為黑馬,最終上季更搶得歐協聯資格,可以衝出歐洲。
始終上季尾成績好好,所以今季都十分憧憬,加上簽入柏奧托利斯同埋穆沙迪亞比,令陣容更完整,但第一場作客對紐卡素大敗,加上主力明斯,積及藍斯同埋布安迪亞需要長唞,當時真係有少少信心動搖。不過之後主場繼續保持強勢,去到12月接連擊敗榜首雙雄令維拉一度有機會登上榜首,亦令我曾有一度幻想可以奪冠。要成為冠軍當然要配合天時地利人和,除咗自己踢得好,球證一環都會影響賽果,最佳例子就當然係主場對錫菲聯。
之後球隊開始陷入低潮,主場先後不敵紐卡素、曼聯同熱刺,令到前4開始亮起警號;季尾表現更令球迷失望,唔知係咪壓力太大所以影響球員臨場發揮,加上傷兵持續有增無減令球隊開始迷失,而成季最關鍵就係作客成功擊敗強勢嘅阿仙奴,呢3分亦令維拉可以主導前4爭奪戰。
最終球隊真係可以捱到終點,我覺得以維拉人腳能夠得到前4真係難能可貴,而我相信下季應該會係一個艱難球季,不過暫時唔好諗咁多,應該好好享受一下成功嘅球季。
依家放鬆晒,煞科戰作客水晶宮終於可以輕鬆享受球賽。
撰文:Kidd
香港維拉球迷會會長