九巴「英國牌子」雙層電動巴士終於出街接客喇！

2024-05-12 TK KMB & Longwin 九巴及龍運, 新車速報 0

九巴新一批嘅雙層電動巴士終於投入服務！呢款ADL Enviro 500EV 巴士之前一直「只聞樓梯響」，但依家已經有2架成功「出牌」，仲喺2024年5月11號率先服務紅磡海底隧道過海嘅112號路線，來往長沙灣（蘇屋邨）以及北角（百福道）㖭！

九巴表示，相對其他同類型巴士，呢款ADL電動巴士唔止性能好、座位舒適，仲係九巴全新一代電巴車隊嘅重要里程碑。

**（九巴代表喺蘇屋巴士總站會見傳媒，左起：九巴傳訊及公共事務部主管簡學悕、九巴副車務總監（西部）楊晉瑋、九巴助理工程師崔建業）**

九巴副車務總監（西部）楊晉瑋表示，根據九巴資料，依家九巴嘅30架單層電動巴士以及52架雙層電動巴士已經喺40條路線上行過270萬公里，減少咗近3,800公噸嘅碳排放，而且有近740萬人搭過呢啲電動巴士，市民支持度亦算高。

雖然雙層電動巴士比起傳統柴油引擎巴士車價高一半，九巴傳訊及公共事務部主管簡學悕就話咁高成本引入電動巴士對於巴士公司嚟講係好難引入好多架，九巴希望政府可以喺財政上作出援助，當被問到會唔會因為引入電動巴士而逼使九巴需要加價，簡學悕回應加價需要視乎整體財政狀況，九巴喺適當嘅時候先至會向政府作出申請——當然希望政府可以補貼返一啲成本而唔係一下子將成本直接轉嫁畀九巴甚至乘客啦！

至於新一批投入服務嘅Enviro500EV三軸雙層電動巴士，九巴一共引入咗10架——除咗已經「出牌」嘅嗰2架之外，嚟緊淨返嗰8架都會喺2024年內投入服務——佢哋係由英國巴士製造商亞歷山大丹尼士授權嘅廠房生產，特別為香港而設計，呢啲巴士嘅零件同底盤設計可以應對香港複雜嘅路況同運作環境。

（ADL出品嘅雙層電動巴士雙層嘅座位佈局基本上同一般嘅柴油巴士幾乎相同，下層座位佈局需要遷就電池擺放位置就較另一隻牌子嘅電動雙層巴士為好，所以會比較多座位，下層嘅緊急逃生出口亦會較貼近車尾）

Enviro500EV係全香港載客量最高嘅「新能源」巴士，最多可以載到122人，比九巴其他型號嘅雙層電動巴士可以裝多7人。電池安裝位置經過特別安排，包括車底、前軸輪拱同車尾，較分散嘅電池擺放安排令到ADL呢款雙層電動巴士嘅下層車廂，比九巴其他型號嘅雙層電動巴士可以裝多10張畀乘客坐嘅櫈。

**（比較一般柴油引擎雙層巴士可以睇到ADL電動雙層巴士車廂嘅前軸輪拱較高，呢個就正因為有部分嘅電池安放喺呢一個位置）**

ADL呢款電動雙層巴士內部設施包括座位、兩個輪椅停放區、立柱位、緊急出口同埋全低地台同平坦地板，類近返現時九巴用緊嘅同廠柴油引擎傳統雙層巴士，無論車長同乘客都唔需要重新適應，一樣可以有熟悉嘅感覺。

**（負責首航班次嘅葉車長表示其實ADL電動雙層巴士同一般ADL柴油引擎雙層巴士喺操作上無乜大分別）**

呢啲巴士配備咗水冷系統同電池管理系統，可以有效控制電池溫度同埋監測狀態，延長電池壽命。而且喺減速嘅時候，巴士可以將部分動能轉化為電能回收，提高電池效能。呢款電巴只需要充電兩個鐘，就可以行駛350公里，完全滿足九巴超過80%巴士嘅日常運營需求，九巴表示巴士每晚返到巴士廠利用凌晨停泊嘅時間就已經足夠充電畀之後一日全日嘅運作需要，而現時九巴各個巴士廠擁有嘅充電樁位已經可以每晚為105架電動巴士充電，滿足到現時日常運作需要。

首航112號路線會穿越紅磡海底隧道由九龍半島去香港島，令九巴嘅雙層電巴服務範圍擴展到海底隧道同香港島地區，唔止新發展區同繁忙市區，仲包括長途路線——而為咗可以有效比較行車性能表現，九巴會安排ADL雙層電動巴士去行返早前已經有另一牌子雙層電動巴士行緊嘅過海路線（包括112、171、671、900、904），務求可以利用相同行車路線嘅載客環境同路程嚟直接對比出唔同牌子嘅雙層電動巴士優劣之處，可以比較同評估佢哋嘅表現數據，方便將來揀更適合嘅車型。

講返Enviro500EV三軸雙層電動巴士首航112號路線嘅盛況，雖然頭班車係安排喺2024年5月11號1150時由蘇屋巴士總站開出，但據排頭位嘅巴士迷所講，佢係喺5月10號晚2145時左右已經到巴士總站守候，果然夠晒「神心」。

九巴安排咗係朝早1140時開始畀輪候嘅乘客登上ADL雙層電動巴士，為隆重其事，九巴為輪候乘搭ADL電動雙層巴士首航班次嘅乘客準備咗一份少少嘅紀念品：一個印有ADL電動雙層巴士左邊車身圖案嘅布袋以及一張首航乘搭證書。

當然面對一條由蘇屋巴士總站站頭開始排起一路沿著長發街排返出去嘅人龍，單係靠一架ADL電動雙層巴士梗係載唔晒幾百人㗎啦！所以九巴亦都安排咗身披九巴91週年全車身塗裝嘅比亞迪雙層電動巴士以及另一架一般柴油引擎雙層巴士畀輪候嘅乘客——佢哋搭唔到真正首班ADL電動雙層巴士，但九巴仍然派發附有證書嘅紀念品畀呢班乘客。