Pas më shumë se dhjetë vitesh është rikthyer në skenë “Plaga e dhjetë e Gjergj Elez Alisë”. Përgjatë dy ditëve, 12- 13 maj, vepra që i reziston kohës, u rikthye për publikun në Teatrin Kombëtar të Operas dhe Baletit për herë të pestë.
Me kompozim të të madhit Feim Ibrahimit, libret të Ismail Kadaresë, koreografi të Agron Aliajt, skenografi e kostumografi të Naxhi Bakallit, ajo u luajt për herë të parë më 30 mars të 1985, për t’u rivendosur pastaj në vitin 2000, 2005 dhe 2012.
Baleti “Plaga e dhjetë e Gjergj Elez Alisë”, i cili mban të njëjtin subjekt të shkëputur nga "Eposi i Kreshnikëve", përcjell bëmat e jetës së heronjve të legjendave shqiptare, dashurinë e sakrificat për atdheun dhe njerëzit e dashur.
Legjenda nis me Gjergj Elez Alinë, i cili ka nëntë vjet që dergjet në shtrat nga plagët e marra dhe përfundon me duelin e Gjergj Elez Alisë me Bajlozin. Ndonëse me nëntë plagë në trup, Gjergji e vret atë. Në kulmin e gëzimit, ai mbyll sytë përgjithmonë nga plaga e dhjetë që ka marrë, në krahët e të motrës e mes kreshnikëve të tij.
Skenografi dhe konstumografi i kësaj vepre, “Mjeshtri i Madh” piktori Naxhi Bakalli, edhe pse në vitin e 87-të të jetës së tij, mbetet njëlloj i përkushtuar ndaj qasjes sa më reale të subjektit. Ai njihet kryesisht për pikturat dhe muralet e tij, sicc është në sallën kryesore të muzeut të Krujës me titull “Beteja e Skënderbeut”. Por kjo nuk e ka penguar që të nërmarrë hapa të tjerë të guximshëm në karrierën e tij.
“Unë nuk kam mbaruar për skenografi, por jam bindur që i bëj. Unë vlerësoj personazhin dhe angazhoj vetëveten që t’ia arrij, si në kostumografi, ashtu edhe në skenografi”, shprehet ai.
Skicat janë konceptuar prej tij, në mënyrë të tillë që të shfaqin imazhin e historisë së Shqipërisë e të legjendave shqiptare, moralin e tyre, të përfaqësojnë karakteret e personazheve e të veprës, si dhe vetë profesionalizmin e dinjitetin e autorit.
I lindi në Tiranë në vitin 1937, Naxhi Bakalli nuk ka qëndruar kurrë gjatë jetës së tij lëarg pikturës dhe motiveve kombëtare e popullore. Pas Liceut Artistik “Jordan Misja”, u diplomua për pikturë murale në Institutin e Lartë të Arteve. Krahas krijimtarisë së ccmuar me ekspozita, galeri, duke qenë një përcjellës i mirë i karakteristikave etnografike në pikturë, Bakalli nuk ka qëndruar larg auditorëve, duke qëndruar për shumë kohë si pedagog në arte.
Ai do të jetë pjesë e jurisë Kolonia e Artit, një konkurs i përvitshëm që organizohet nga Universiteti Europian i Tiranës, duke mbledhur të rinjtë e talentuar në pikturë, që do të vlerësohen nga mjeshtrat e këtij zhanri.
