余香凝接受電台訪問 罕談與陳家樂分手原因 重遇前度唔尷尬：開心大家都不停進步

憑《白日之下》成為新一屆金像影后嘅余香凝（Jennifer），近日接受港台節目《舊日的足跡》主持車淑梅訪問，期間罕有談及與舊愛陳家樂嘅分手原因。

陳家樂與余香凝喺2018年結束3年半戀情，當時有傳分手原因係余香凝偷食年薪過百萬嘅保險男，而Jennifer澄清只係朋友關係，陳家樂亦強調對方冇偷食。去到近日，余香凝接受《舊日的足跡》訪問，佢罕有談及與陳家樂分手嘅原因：「當時大家嘅發展和性格唔同，是時候好好講再見，於是就分手」，至於被指因拜金而分手，佢就話：「有啲人煽風點火，我要學識自己去調節，我清楚整件事，唯一可以做嘅係做好自己。當時好不開心，有好多網絡攻擊，不過，慶幸因為有幾部電影，我要出來謝票，令我收到好多前輩同影迷嘅鼓勵，好窩心，我相信善良係存在嘅」。咁被問再見到陳家樂會唔會尷尬，佢就話：「我哋都係為香港電影業努力嘅演員，都想做好自己。我有睇佢啲電影，好開心大家都不停進步」。

喺2017年，陳家樂接余香凝收工時遇上車禍導致Jennifer鼻骨爆裂，陳家樂當時承諾會照顧佢一生一世，並送上鑽石戒指。而喺接受訪問期間，佢亦有提及車禍，並話：「嗰次係我人生一大衝擊，令我知道意外可以隨時發生，教我更珍惜生命，愛家人要及時表達！當時我受咗傷但唔算嚴重，可以繼續拍戲。車入面仲有我當時嘅男朋友家樂，我哋唔係因為呢場車禍而分手」。

另外，Jennifer亦有講到自己愛上老公Tim嘅原因，佢大讚對方係一個好人及老實人：「因為佢係一個好人！佢唔係才俊，佢係個老實人、唔花巧。老爺奶奶都係平實同努力工作嘅人，我哋冇情節豐富嘅愛情故事。佢比我大13年，佢嘅中文唔係太好，求婚時講咗一段老土說話，佢話佢好幸運遇上我，我係佢心中嘅天使。我仲記得生BB嘅時候好緊張，叫佢準備一啲說話同我講，結果他都只係講咗兩、三句」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！