【明報專訊】世界多處近期爆發戰火及不幸事件，生靈塗炭。香港佛教聯合會喺紅館舉行慶祝佛曆二五六八（2024）年佛誕節吉祥大會及浴佛活動，主題同和平有關。佛聯會會長寬運法師致辭時希望通過法會為「止戰息爭，世界和平」誦經，話大小戰爭每日發生，市民亦要對苦難生起憐憫心和慈悲心，又話「遠方的戰爭讓我們明白，只有社會和平安定，人民才能豐衣足食。我們要格外感恩可以生活在香港這片福地，不愁衣食，災難不侵，社會長保和諧穩定」。
佛聯會誦經盼挽人心敦世道
佛聯會今日（16日）會再舉行「金剛經吉祥誦經法會」，佛聯會執行副會長兼司庫何德心亦話，屆時會為一切戰爭災民及罹難者誦經，期望「挽人心、敦世道、人心正、世道昌、國家興、香港榮、戰爭息、世界平」。
政務司長陳國基同民青局長麥美娟噚日都有出席吉祥大會。陳國基其後喺facebook講佛偈，話佛教有一個道理係「無常」，講吓講吓講到去讚揚設立關愛隊，正好貫徹「世事無常，人間有愛」，提到𠵱家18區合計有450多支關愛隊，能夠喺突發事件中為居民提供貼心和即時嘅服務，舉例上月佐敦華豐大廈三級火就係例子，隊員喺大火後逐家逐戶了解受影響住戶需要。