DILI, 16 maiu 2024 (TATOLI) – Ekipa Warikoan FC susesu “lulun” adversáriu FC Irmão Timor ho rezultadu 2-0, iha jogu kontinuasaun kopa Maun Boot Kay Rala Xanana Gusmão, ne’ebé realiza iha Estádiu Munisipál Dili, kinta lokoraik ne’e.
Vitória ne’ebé Warikoan hetan lori ekipa ne’e tuur metin iha tabela klasifikasaun provizóriu grupu G ho pontu tolu, posizaun primeiru okupa husi Bairro da Paz FC ho pontu tolu no ikus liu okupa husi Irmão Timor no Assa FC.
Minutu primeiru jogu la’o ekipa rua lansa kedan kontra no atake ba malu tuir tékniku no abilidade ekipa idaidak nian tuir orientasaun husi treinadór ekipa rua nian.
Irmão Timor hala’o jogu ho velosidade ne’ebé maka’as ho modelu ofensivu ka halimar ho bola aas nune’e bele halo golu lalais, maibé jogu Irmão Timor nian sempre falla tanba blokeia tutuir husi jogadór Warik Oan.
Warik Oan hatudu jogu ho velosidade maka’as maibé la konsege falla iha finaliade tanba avansadu sira susar iha ezekusaun, sutu barak mak avansadu lansa maibé nunka kona iha alvu, sutu barak mós guarda rede salava.
Maske ho presaun makas la hamate Irmão Timor nia mentalidade atu hatudu jogu ne’ebé bonitu nafatin iha kampo laran hodi anima adeptus sira ne’ebé tur nahe aan iha tribun leten hodi hakilar fó suporta másimu ba sira nia ekipa favoritu.
Kontra atake sai manas liutan iha minutu 20 ba leten, jogadór Irmão Timor lansa ona golu primeiru maibé golu ne’e anula la vale tanba jogadór ne’e tama uluk iha lina oin Warik Oan nian, nune’e árbitru deside la golu.
Husi rezultadu ne’e ekipa rua tenke empata 0-0 iha minutu primeira parte no deskansa minutu 15 hafoin kontinua fali minutu segubda parte nian.
Hakur ba jogu segunda parte nian ekipa rua kontinua lansa kontra no atake ne’ebé másimu ba malu, maibé Warikoan hatudu liu nia forsa hodi domina iha kampo laran la fó fatin ba Irmão Timor atu halo jogu.
Maibé Irmão Timor buka meiu hotu hodi ultrapasa husi atake Warikoan nian, avansadu Irmão Timor lansa sutu barak ba baliza Warikoan nian maibé guarda rede tenta baku sai hodi salva bola la konsege tama ba rede laran.
Jogu la’o to’o minutu 47 jogadór Warikoan Nencio de Jesus (7) hetan oportunidade lansa golu primeiru muda rezultadu ba 1-0. Golu ne’e halo Irmão Timor tenke servisu maka’as iha kampo laran nune’e bele halo empata jogu ne’e, maibé esforsu ne’ebé jogadór Irmão Timor halo hela de’it hanesan esforsu tanba la rezulta golu.
Maske halo ona golu ida, Warikoan lakoi hela de’it ho golu ne’e kontinua esforsu liu husi tatika oioin, pasa bola ain ba ain nune’e bele sobu defeza Irmão Timor atu bele prodús tan golu.
Esforsu ne’ebé Warikoan halo la hela de’it hanesan esforsu tanba iha minutu 65 jogadór Serafim Brito (17) responde tan golu ida muda rezultadu metin ba 2-0. Golu ne’e mós fó tristeza tebes ba Irmão Timor tanba minutu besik termina ona tenke esforsu maka’as maibé Warikoan hamate tutuir sira nia jogu.
Ho nune’e minutu normal jogu nian termina ekipa rua tenke para jogu vitoria hela ba Warikoan no derrota hela ba Irmão Timor. Nune’e Warikoan mak iha direitu absoluta ba pontu tolu no Irmão Timor kontinua hela ho pontu mamuk.
Jogu referidu dirije husi árbitru prinsipál Pedro Braga, juiz liña Ricardo Amaral, Pedro Santiago no árbitru rezerva Francisco Pereira.
Notísia relevante:Derrota ho 1-2, posibilidade Vila-Vista FC elemina husi kopa Xanana
Jornalista: Hortencio Sanchez
Editór: Florencio Miranda Ximenes
