「喂Gary，我係Kitty呀，唔好意思阻一阻你，想問下我老公而家係咪同緊你一齊呀？可能你哋間餐廳訊號好差，打畀我老公收唔到。」以上係一段WhatsApp嘅message，由於我並冇入到對方個number落phone book，所以都load咗一陣條女講緊乜，唔通係電騙之類？又唔係吖，條女知道我叫Gary喎！
同同事食緊飯嘅我都忍唔住自言自語：「邊個Kitty呀？」只係講咗個英文名，都冇講WhatsApp內容講乜，但係同枱食飯嘅男同事Perry已經搶答：「Sorry，我老婆嚟㗎！得！我打返畀佢！」只見Perry匆匆忙忙拎起自己個電話打畀老婆，等等先……你老婆搵我做咩？唔係間餐廳訊號好差收唔到電話咩？
其他同事見到呢個情況都笑咗出聲，個別一兩個仲搖晒頭，但Perry一路打電話，一路做咗個「殊」嘅手勢示意大家唔好笑住，連隨聽到佢對住個電話講：「又點呀？咪話咗今晚同班同事食飯囉！有咩就直接打畀我啦！你搵Gary做咩啫？開乜嘢鏡頭呀？食緊飯點樣開鏡頭呀？一係你而家飛的過嚟睇喇，我畀餐廳地址你！」
Perry似乎驚畀其他食客聽到會尷尬，佢講多兩講直頭起身行咗出餐廳繼續傾，我趁住佢離席就即刻問班同事：「咩料？佢老婆點解會搵我？」
另一位叫Kingston嘅同事同我講：「Annual Dinner呀！你唔記得咩！嗰晚已婚同事可以帶老婆仔女出席，Perry老婆加咗我同你WhatsApp，唔記得嗱？」
Perry老婆喺Annual Dinner當晚的確同我哋部門一齊坐，但係WhatsApp……我記得喇！佢老婆話一早加晒Perry公司同事contact，不過我同Kingston都係2023年先加入呢間公司，之前冇出席過Annual Dinner，所以當晚係第一次見我哋，話要交換contact，問題係同事個老婆交換contact把鬼咩？一來唔需要，二來唔係要溝你，三來你又唔係靚，但Perry個老婆都係問咗我同Kingston嘅電話號碼，再即場打電話嚟，叫我哋唔使聽，只需要save低佢number落phone book就得。
我梗係冇save啦，但原來Perry老婆有save，仲已經入埋我個名，難怪我呢次收到WhatsApp會咁陌生。
我：「Kingston你唔覺得奇怪咩？當晚Annual Dinner我哋同佢老婆講咗幾句嘢咋喎！仲記得佢老婆話要交換contact嗰陣，我哋仲你眼望我眼覺得好疑惑。」
Kingston：「奇怪㗎！疑惑㗎！但係兩個月前我已經收過Perry老婆嘅WhatsApp，嗰晚7點幾，佢老婆問我Perry係咪開緊OT，所以我比你更早經歷咗，覺得好癲好搞笑，不過唔意外。」
同枱其他同事原來都經歷過晒，而其實男同事嘅遭遇已經算碎料，呢晚食飯有位女同事叫Sharon，Perry老婆煩得佢仲勁。
Sharon：「有一段時間Perry老婆係隔幾日就打畀我，直接打嚟，唔係WhatsApp，office hour又試過，夜晚又試過，假期都試過。」
解釋多少少先，喺工作上，Sharon係直接under Perry，算係Perry嘅assistant，所以Sharon始終要留返幾分薄面，好難直接ignore或者太過無禮去對待Perry老婆。
Sharon：「我記得Perry老婆第一次打畀我已經喺電話裡面喊，話覺得老公出去滾，仲懷疑出軌對象係公司嘅女同事，初初我係有少少八卦想聽，加上大家都係女人，多多少少同情佢，點知聽聽下唔對路，我發覺Kitty……即係Perry老婆好似有被害妄想症咁，又以為自己老公係萬人迷，公司個個女同事都會鍾意Perry，所以後來我唔想再聽唔想再煩，會話忙緊要收線，或者直接唔聽Kitty電話。」
Annual Dinner並唔係Perry老婆拎大家電話嘅主要「戰場」，原來以前公司耐唔耐都有一啲大大小小嘅聚會，而Perry老婆係會無預警之下嚟到扮接老公，再趁機認識我哋同事，手法又係話交換contact，夾硬問電話打個call嚟，嗌人save低佢number，再順便save埋你number之後「攞料」。
Sharon：「Kitty最癲試過問老細拎電話添！老細唔畀，秘書喺隔籬擋咗之嘛！其實你諗真啲都幾過份，我哋都唔係個個同事有老細私人number啦，一個下屬嘅老婆走去拎老細contact，係咪傻㗎？我當時都好後悔有聽到Kitty電話，佢次次打嚟都問呢個女同事會唔會同Perry有路？嗰個女同事會唔會勾引Perry？大姐呀！你當你老公係彭于晏咩！」
我：「咁Perry老婆都幾信任你喎！」
Sharon：「信佢條命！佢打嚟問我Perry同Jessica, Rebecca, Catherine佢哋有冇路，轉頭又打畀Jessica, Rebecca, Catherine，問佢哋Perry同我有冇搞埋一齊，佢老婆係懷疑晒全世界嘅女人㗎！」
全部同事熱議緊呢個話題嘅時候，我發現席上有一位叫Edison嘅男同事冇參與，咁文靜嘅？唔似佢平時嘅作風喎！
我：「Edison，成晚唔出聲嘅？唔通你守得住個電話號碼，冇畀Perry老婆？」
Edison：「其實……應該係我累到大家咁，因為好多年前有一次我同Perry去按腳，燈牌有哈哈笑嗰啲呀！因為Perry按半粒鐘已經趕住走，我自己又加鐘改埋入房按，咁完事咪WhatsApp呀Perry講下賽後包膠囉！隔咗個零鐘之嘛，原來Perry條友已經返到屋企，仲沖緊涼，我點知Perry老婆有佢iPhone密碼可以開嚟睇啫！」
咁大鑊？Kingston同Sharon都追住問點收科。
Edison：「冇呀，我WhatsApp打咗句話『頭先條女好正，你咁快走，係咪條女唔得？』然後Perry個WhatsApp就覆返『我係Perry老婆，你哋頭先玩咩？去叫雞呀？』我情急智生……」
我：「跟住呢？講嘢唔好1999啦！」
Edison：「我情急智生，覆返句『我其實係Edison女朋友，我都想知Edison係咪同你老公去滾？』我都唔知點解會咁樣reply，人一慌張就係咁！」
Kingston：「智商正常都會唔信啦！」
Edison：「唔係呀！佢老婆信呀！仲同我WhatsApp傾咗陣，但自此之後，Perry老婆就會趁公司gathering扮出嚟接老公，總之要識晒我哋所有同事，不過佢老婆每次望我嘅眼神明顯好唔友善。」
Sharon：「梗係唔友善啦！原來係你害到我當時要招呼Perry老婆，我聽日返公司同Jessica佢哋講，佢老婆疑心重啫，唔係傻㗎！你扮係自己女朋友send啲咁嘅message畀Perry，邊個信呀？」
後來Perry講完電話返入嚟，一齊參與咗呢個討論，佢話老婆其實唔信嗰次係Edison女朋友，所以呢幾年不斷舊事重提，但Perry都冇嘢可以做，終極大絕都係死口唔認呢招，仲話呢幾年唔好講咩按腳，連喺街望女仔畀發現都鬧，又成日佢有冇喺公司偷食。
Perry：「守行為同接受感化都有期限吖，我而家無了期呀！唔使理我老婆，你哋唔應機，佢自然會直接打畀我。」
慘！我指Perry老婆Kitty同埋我哋呢班無辜嘅同事，Perry同Edison就算啦！去哈哈笑嗰啲地方按腳都要傾賽後包膠，真係早知今日，何必當初。