林作帶媽媽裕美現身母親節活動 七師傅亂入爆林作想換畫

一年一度嘅母親節，坊間有唔少活動表揚偉大嘅母愛，而近年新聞多多嘅 林作 呢日亦同媽咪  王莉妮 仲有女友 裕美 一齊現身其中一個活動，依舊亂噏廿四嘅佢，現場亦將女友同阿媽嘅關係擺晒上枱，仲話心情既複雜又緊張，仲話期望晚飯平安度過已經心滿意足云云。

林媽媽亦都話第一次三人一齊過，所以要好好慶祝，而即將推出新歌嘅裕美，仲話會將相隔13年再推出嘅新歌獻作禮物，成首歌亦係圍繞住林作喎。雖然林作一如既往乜都噏得一餐，不過至少都知媽咪至愛係食白切雞，又爆媽咪打扮係模仿新聞人物「新何太」咁話。

呢對母子呢日亦繼續舌劍唇槍，問到係咪想盡快飲新抱茶，林媽媽就借力打力，指早前飲完「人哋嘅新抱茶」而家自己就非常想飲，而林作就開支票指，如果新歌可以登上頒獎禮就會求婚，冇好成績就會分開喎。

之後加入訪問嘅七師傅，更係連珠炮發，指林作愛自由唔想結婚，反而保持現狀會仲舒服，又爆佢非常想換畫，聽到裕美一頭煙。呢個時候林媽媽又撥火，問七師傅林作有型定係「飛機師」有型啲，而師傅就答話會揀有才華嘅林作喎。