【明報專訊】政府大力宣傳國家安全嘅重要，但唔係人人明白《港區國安法》、《基本法》23條等概念，弱勢社群接受資訊或更困難。香港聾人協進會噚日就搵咗工聯會議員鄧家彪做講座嘉賓，向聾人朋友介紹國家安全法例。阿彪唔識手語，現場主要靠手語翻譯，佢同Emily講，開始時刻意講慢啲，但翻譯反而提佢按正常語速自然啲就得。講座設答問環節，有在座者追問阿彪，點樣保障香港能落實「一國兩制」。
今次係阿彪首次為聾人講述國家嘅歷史、社會、經濟及環境現况，重點當然係國安法知識。阿彪輔以PowerPoint圖文，介紹國安法及23條中嘅9項罪行，並主要講3項問題，包括邊樣罪行要強制舉報、參加國際會議有無風險問題、煽動意圖嘅圖書要點處理等。喺答問環節，阿彪話在場者反而問一啲好闊嘅問題，有人問佢點樣保障一國兩制，阿彪話《基本法》講明有一國兩制，而且無講明限期，係長期運作，叫大家唔使擔心。
阿彪形容活動「幾有趣」，佢話其實想睇吓手語翻譯動作，但同佢平排企，未能偷師學到點樣用手表達國家安全用語。