【點新聞報道】無綫《東張西望》報道76歲何伯與年輕逾30年的何太閃電再婚故事，引起全城關注。擁有三位女友的鄧兆尊亦有留意事態發展，昨日（14日）在YouTube Channel「田豪祖3寶」直播期間，鄧兆尊直言：「我懷疑何伯係抄我，佢買啲嘢咁似我買嗰啲嘢？」他還勸何伯夫婦不要再做訪問，因子女不會出場，最終全家人都是輸家。
鄧兆尊在直播接受貴花田和曾志豪談及何伯事件，他表示與三名女友都有一齊收看，他更笑稱「嗰對龍鳳鈪犀利過超人！」對於何太聲稱「佢愛我咪買好多嘢畀我」的言論，惹來不少太太異議，問到有否受影響？隨時「一闊三大」？兆尊笑說：「冇，我冇受到影響，我懷疑何伯係抄我，佢買啲嘢咁似我買嗰啲嘢？龍鳳鈪我冇，我冇佢咁叻，但鑽石耳環、戒指都有買過嘅，係識咗之後先買，得到咗個肉體，係我畀佢。」
兆尊再被問何伯應否給新何太100萬？他說：「你自己搵番嚟嘅錢，就算去澳門一鋪過買100萬都得呀，自己搵呀嘛，使得快定使得慢都係冇分別，呢方面我撐何伯。」而何伯亦覺得真金換真心，他就說：「一個女仔咁樣衝埋嚟，你自己feel到喇，做咗咁多年人，不過我會睇吓好唔好食，好食再嚟幫襯囉。」主持追問鄧兆尊會否替何伯斷症？鄧兆尊笑說：「唔使我幫喇，佢而家得番4000幾蚊，如果女仔咁愛佢，會照顧佢喇，一日三餐佢包晒，仲有湯飲！」在直播上，鄧兆尊亦有分享自己的經歷：「我呢就好抵死，你越要我就唔畀，你唔要嗰啲我就會畀你，你有無釣過魚呀？落咗餌要chok下chok吓，條魚先會上釣，（你要chok幾耐先會上釣？）視乎嗰條魚聰唔聰明囉！」
鄧兆尊還說：「三位都係一面倒覺得衰，就算第三個都係咁講，煲湯呢樣嘢，我好簡單咁講一句，我識好多內地人為咗攞身份證，結婚之後再離婚，之後再搵自己鍾意嘅嘢。呢樣真係冇得講，到咗呢個年紀搵個伴好應該，不過係你哋低俗睇錯咗啲啫！」
何伯在訪問上曾提到「個個女人埋身，啲仔女都會反對」，鄧兆尊直言說：「何伯講呢番說話好明顯綵排好耐，經過太太訓導同綵排好耐先講，如果唔係冇理由咁清晰而隔離嗰個又唔駁嘴嘅。到佢哋呢個年紀，你哋啲後生未必知道佢哋追求啲乜嘢，可能想有人陪住佢行街。」言談間鄧兆尊叫何伯夫婦不要再做訪問：「你哋唔夠TVB玩嘅，連續劇做足半年就無謂啦！而家先講買嘢，下集講公屋，一個話題可以玩一個禮拜，連福祿壽都扮啦！睇嘢清晰啲！仔女唔會出場喇，其實對成家人嚟講係輸晒。」
（點新聞特約記者陳惠芳報道）
收藏
取消收藏
分享
