專訪黃劍文｜參加《中年好聲音2》全因一個「使命」 坦言面對「紅歌唔紅人」「反骨」：我只係一個音樂人

相繼參加過多個音樂比賽，由《超級巨聲》、《中國好聲音》到《全民造星》及《中年好聲音2》等等，亦曾簽約公司以歌手身分出唱片。一路上浮浮沉沉，有支持的聲音，更不乏網民質疑及批評，不少人都會疑惑Kimmna再次參加比賽的原因。Kimman直言參加的契機其實是來自於去年7月參加為期一星期的泰北宣教活動。他提到當時到泰北服務時接觸到一班孤兒，沒有父母照顧，但生活依然可以過得開心充實，令他不禁憶起雖然自己生於單親家庭，卻依然擁有可以追夢的能力，可以做自己喜歡的事情，與當地的孤兒相比，自己根本沒有放棄的原因。

另一方面，Kimman坦言參加《中年好聲音2》有一種使命感：「如果多啲人認識我，我諗過做一首歌同佢哋唱，佢哋係我一個推動力，我有一個使命，希望更多人認識到佢哋，幫到佢哋，所以我都叫帶住一個使命去參加呢個比賽。」

坦言面對負評 曾被指「紅歌唔紅人」「反骨」

《中年好聲音2》比賽完結已有一段時間，Kimman亦坦言自己的確比從前更「入屋」，除了工作量有增加，日常生活亦多了不少支持的聲音。不過，其實多年前Kimman曾簽約其他公司，當時推出的歌曲《我們的》亦曾受到不少人關注，事業卻依然浮浮沉沉，更被指「紅歌唔紅人」。對此，Kimman不僅沒有視作負評，反而感激網民：「我都開心，因為首歌係我寫」。而他亦坦言其實一直都未有想過「紅」的問題：「有觀眾去欣賞去鍾意我已經覺得開心，我係咪要去到好紅呢？我就冇諗，因為你唔知你際遇會係啲乜嘢，你做到啲乜嘢啦。因為一直以嚟做音樂都係我自己，同自己作曲比較多，都要睇公司有冇足夠嘅資源去投資或者去讓我做更多嘅嘢。所以如果你話當時ViuTV都係開台，其實都未係好多人睇。所以你話首歌紅我都真係開心嘅。」

由ViuTV完約，再到參加TVB《中年好聲音2》，Kimman曾被網民批評「反骨」，他亦不以為然：「唔關事，因為係我已經完咗合約，就好似你打完份工，你完咗個Contract緊係要搵其他工作。同埋由一開始我參加比賽都係去《超級巨聲》先啦。」談到當年不再續約ViuTV原因， Kimman感恩當時可以做歌手推出唱片，開心可以完夢，不過亦理解公司「捧人」決定：「我嗰段時間係多咗好多Fans嘅，但係接住落嚟Viu開台當然要有唔同嘗試，當時就唔係好多Focus喺我身上，當MIRROR出嚟都已經捧咗佢哋。當然如果我喺一個老闆，佢哋爆我都會推佢哋出去。」及後到合約完結，他亦坦言當時感到發展停滯：「因為當時嘅我已經4年喺Viu，個發展好似都係咁樣，有少少停滯，既然係咁不如我自己做獨立。」

被負評發明星夢？ Kimman：我只係一個音樂人

每一個追夢者在追夢過程中少不了被批評「發明星夢」，Kimman直言：「我冇發明星夢，我只係一個音樂人做音樂，我嘅音樂有冇人鍾意幾多人鍾意唔係你Control。我覺得只係做你鍾意做嘅嘢就啱㗎啦，我只係唔放棄做我嘅音樂，我認為對就去做，我唔係要發咩明星夢。就算我唔係在線歌手，我都會繼續做音樂同創作，因為音樂係我鍾意嘅事。就算我發明星夢都唔係錯啊，呢個都係一個夢想，就算佢哋點講我都唔會介意。」Kimman亦希望大家可以多點鼓勵，支持追夢者：「咁講嗰個人都有自己想做嘅嘢，你做唔做到先？咁你做唔到咪唔好講！我覺得做到嘅人唔會講，佢做唔到咪會講。」

追夢路上，Kimman亦透露曾有放棄念頭，直言當收入及存款未能再支撐生活就會放棄，更一度視《中年好聲音2》為最後一個演出，所幸節目後工作不斷。接下來，Kimman將出演以張國榮為主題的音樂劇《為你鍾情》，亦計劃推出個人單曲，憑「只要有夢想 凡事可成真」信念，繼續在音樂路上打拼。