【Viu】港產動作電影《九龍城寨之圍城》口碑票房都十分好，截至昨日（16/5）香港已收破五千五百萬，導演鄭保瑞與演員古天樂、林峯、劉俊謙、胡子彤及張文傑，開心到康城，電影入圍第77屆康城影展「午夜展映單元」，佢哋著靚靚現身當地記者會，城寨四少更應邀擺出功夫功架影相！到當地時間晚上9:30（香港時間今晨03:30），佢哋再浩浩蕩蕩行康城影展紅地氈，唔少當地採訪記者同粉絲都搵古天樂等合照簽名留念。
講感受，瑞導話冇幻想過去到康城，最開心一部本土動作片可以咁成功。旁邊古仔笑言：「都係你叻啫﹗」鄭保瑞回應：「大家都有份﹗搵到你哋先至係叻﹗」：古仔就話：「九龍城寨已拆，我哋將城寨重現，某程度希望可以帶動到香港的旅遊業。」佢又話嚟到康城一定要有充足睡眠同食美味海鮮盤，而導演就要多啲影相留念。同是首次踏足康城，四子感受甚深，林峯都係話估唔到啦，劉謙話：「好似創舉一樣。」胡子彤話：「冇大家我就冇機會嚟，入圍以至所有事情都好新鮮。」張文傑表示：「好似發夢一樣」古仔笑言：「所以叫你有足夠的睡眠﹗」
在康城影展觀賞場，現場觀眾睇到尾聲，未完場前已陸續起立歡呼，並無間斷鼓掌近10分鐘，胡子彤、張文傑更熱淚盈眶表現感觸，導演鄭保瑞致辭完畢後，不少熱情觀眾簇擁着導演及一眾演員，要求簽名合照並擁抱。
