多謝曼城幫手　維拉相隔41年再戰歐聯

曼城上場英超以2比0擊敗熱刺，阿士東維拉成為最大得益者，提早1輪鎖定聯賽第4位，獲得下屆歐聯入場券，亦係維拉自1982/83年球季之後，再次可以參加呢項大賽。與此同時，英超4個歐聯席位亦大局已定，包括曼城、阿仙奴、利物浦、阿士東維拉。

賽前熱刺落後踢多1場嘅維拉5分，必須擊敗曼城，先至可以保持爭前4位機會，但全失3分之後，下季最多只能踢歐霸盃。至於維拉史上曾經兩次參加歐聯，包括1981/82年球季首次參賽就奪得冠軍，至於1982/83年球季則8強止步，自此之後一直同呢項大賽無緣。因此，維拉亦成為自1992/93年球季歐聯改制之後，第11支參加歐聯嘅英格蘭球隊。

另外，下屆歐聯正賽將由32隊擴軍至36隊，現時已經有21隊穩奪入場券，包括英超4個席位、德甲5個席位都已名花有主。