佘詩曼年幼喪父 佘媽媽 獨力湊大三子女
原文：Sunday kiss │圖片：佘詩曼facebook、佘詩曼微博、新傳媒資料庫、TVB節目截圖
佘詩曼5歲喪父 佘媽獨力湊大仔女
現年42歲的佘詩曼有一個哥哥和一個弟弟，喺阿佘年僅5歲時爸爸因交通意外而離佢而去， 佘詩曼 媽媽母兼父職，獨力湊大三個仔女，更加供阿佘到瑞士留學修讀酒店管理課程，實在唔容易。而自幼喪父的阿佘都好生性，當年在協恩讀書嘅阿佘自己做功課同溫習，不用母親操心，而為了媽媽不感孤單，阿佘從小就陪媽媽瞓覺直至她十幾歲到瑞士留學。試過有一次，阿佘和哥哥弟弟好想去戲院看電影，但因為當時家境欠佳而未有買票進場，佘媽更為此感到內疚，難得年紀小小的阿佘好懂事，提議去不用花錢的公園玩，真係好乖！
觀眾嫌棄雞仔聲 阿佘發奮學演技
佘詩曼 97年在瑞士畢業返港後選港姐，當年嘅港姐冠軍翁嘉穗同亞軍李明慧因為掛住爭仔，對娛樂圈無心戀戰，造就奪季軍的佘詩曼一卸任就被大台力捧，出道後即獲擔任女主角，先後擔正拍劇集《雪山飛狐》同《刑事偵緝檔案IV》等劇，雖然初期被觀眾踩佢唔識做戲兼雞仔聲，但阿佘努力進修演技，演技亦愈做愈好，2000年拍主張智霖主演《十月初五的月光》更一炮而紅，之後拍過多部劇集如《宮心計》、《公主嫁到》、《使徒行者》等都係當年收視冠軍，06年阿佘終憑《鳳凰四重奏》一人分飾四角，登上第一個視后寶座。
報答養育之恩 阿佘送車又送樓
因為知道媽媽獨力捱大三兄妹很不容易，所以 佘詩曼 也非常孝順，工作再忙都會抽空陪媽咪過生日及母親節，每年母親節及生日都和媽咪慶祝，她更留言說：「我相信一見鍾情！因為從我出生睜開眼的那一刻，我便愛上我的媽媽了！」
現年67歲嘅佘媽媽Lily正享受退休生活，在2015年她出席公開活動時曾透露，阿佘曾送上一幢三層高嘅村屋作為母親節禮物，又試過送上名車給她，至於兒子則畀咗一筆錢佢做自己喜歡的事。Lily直言：「以前養大一對仔女好辛苦，目前是收成期，人生去到呢個年紀，最重要係過得好！」看阿佘咁有孝心，相信佘媽媽都深感安慰。
阿佘封視后 佘媽現身送驚喜
2011年，佘詩曼登上福布斯中國名人榜第67名，是首位登上此榜的TVB女藝人。2014年阿佘更憑劇集《使徒行者》「釘姐」一角，連奪「最佳女主角」和「最受歡迎電視女角色」，成為首位「雙料視后」，而長居美國嘅佘媽媽突然現身無綫為女兒送上驚喜，阿佘冇諗過媽咪會現身，驚喜到又喊又笑，阿佘喺台上多謝媽媽一直喺身邊照顧佢，因為自己拍劇壓力好大，成日發媽咪脾氣，但媽媽都一一包容，場面相當感人！
母親生病 阿佘探不得好想哭
現在離巢無綫的佘詩曼自組工作室，長時間在內地工作賺人仔，之前佢接拍內地廚藝真人騷《星廚駕到3》，仲攞埋全季冠軍，令她在內地人氣急升成為搶手貨。不過去年佘在內地節目《說出我世界》中，說出了鮮為人知的經歷，原來2005年有一次她身在北京參加頒獎禮時，卻傳來母親在美國病重的消息，阿佘說：「當時在台上很想哭，但是我不停的告訴自已，忍住、不能哭，不可以把傷心的情緒帶給觀衆。那一刻我真的很討厭當明星，因為我永遠都要把自己真實的情緒藏在心裏。」而那次後她決定每月要抽時間探望媽媽，再忙也要這樣做！
佘詩曼：一直有拖拍
16年離巢無綫，轉往電影界發展又北上搵真銀，佘詩曼終於回歸香港同老拍檔黃子華合拍賀歲片《棟篤特工》。等到頸都長，農曆新年，《棟篤特工》正式公映，阿佘聯同子華及一眾演員密鑼緊鼓四出為新戲宣傳造勢。
離巢後人氣、片約繼續上揚，工作排到密密麻麻，平時唔使開工都係同七魔女聚會或者做孝順女陪媽媽，不少人擔心42歲單身女郎佘詩曼疑似感情多年空窗冇著落，阿佘今年初接受本刊專訪就自爆雖然目前單身，不過多年來斷斷續續都有拖拍：「呢幾年梗係有拍過吓拖啦，不過就梗係唔話畀你哋知啦，咩都話畀你哋知咩！如果有穩定戀情被影到或者公開咗，我覺得都好自然，若果真係成事嘅時候，一嚟係開心事，二嚟想避都避唔到，到時都會同人分享，等我好消息，OK？」
至於依家感情狀況，當然不乏追求者，但追求人士亦都貴精不貴多：「追求者唔使咁多，好嘅一個就夠，我又要做嘢，應付唔到咁多人。我諗呢啲嘢要睇緣份，有時人哋刻意討好，我會唔知佢想點，但好自然令我欣賞佢，我覺得最舒服，先至會長久，因為我欣賞嘅係真正嘅佢，遇著啱就唔等喇，呢個年紀仲邊有咁多時間醞釀呢？所以我覺得唔排除閃婚呢個可能性，遇到啱就會去做，但單身生活我都享受，唔會為結婚而結婚囉。」
過億身家五樓揸手
佘詩曼由97年選港姐紅到依家、肯做肯捱有價有市，最緊要亦都投資有道，正如范冰冰講過：「我不嫁豪門，我就是豪門！」阿佘毋須為結婚而結婚，皆因名下物業豪宅遍布港九新界，嫁妝粗粗哋都過億，搵另一半絕對要小心揀：「擇偶條件，我諗要好似全盒咁，乜都有啲，唔需要超級靚仔、唔需要超級有錢，或者超級叻，但係唔係好樣衰、唔好太廢咁囉，個個見到全盒都好開心，我都想搵一個我會欣賞嘅人，啱傾啦，同埋要read到大家嘅mind，起碼唔會講完嘢之後唔知講乜。其實我冇刻意去揀邊一類人，我諗圈唔圈中人各有各好處，同圈外人生活可能會正常啲，同圈中定圈外人拍拖始終都有啲分別嘅，我未試過，我又真係唔知得唔得。」
七年之癢再合作
七年前合拍電視劇《絕代商驕》，佘詩曼與黃子華首度合作已經擦出火花，創出40點全年最高收視紀錄。七年後移師大銀幕再發放連場笑彈：「我哋兩個冇七年之癢，一拍就即合番！子華今次唔止係演員亦都會參與劇本，佢好了解我，知道我底線同埋尺度去到邊，所以呢個角色真係佢度身訂造畀我做。話說因為佢個角色曾經嚴重欺騙過我肉體同心靈，所以我用盡畢身精力去追殺佢，由交通警做起捱到上保安局局長，就係為咗用最大權力所有方法去趕盡殺絕佢。呢個角色因為感情受創、內心嚴重扭曲，鬱到個面容都扭曲，所以我講句嘢都係戚起個嘴角，從未試過咁樣衰刻薄⋯⋯唔知係唔係因為子華見到我個樣咁樣衰啦，可能驚我搶咗佢啲戲，所以佢就整咗好多仲樣衰過我嘅造型出嚟，務求冚咗我啲戲囉。」
佘詩曼 有獨門凍齡秘訣
念舊再拍戚其義
子華神都驚畀人搶戲？佘詩曼澄清純粹講笑啫：「其實子華份人做嘢時好正經，拍戲時冇整蠱我仲去得好盡㖭！有時啲造型樣衰到我都笑佢：『嘩！乜你咁都制！』為套戲真係好大犠牲！」忙完《棟篤特工》宣傳就會收爐，過完農曆新年，阿佘就話除咗同梁家輝合作的《西伯利亞風雲》同宮廷劇《延禧攻略》會輪住推出，自己將會投入戚其義監製新網劇拍攝：「我成日上網睇粉絲留言，好多人都話我咩角色都做過，係未做過律師，想我做律師喎⋯⋯今次率先爆畀大家知，過完年拍戚其義監製、周旭明編審新劇我就真係做律師，大家滿意啦？對我嚟講就真係好大挑戰，要我做好多功課，考我記憶力。至於個班底呢，幕後幕前都係合作開班底，女主角你哋知啦，男主角就要賣個關子，遲吓至公布得！」
