周殷廷舉行首個個人音樂會 嘉賓Gin Lee感動至淚流滿面

周殷廷 嘅一連兩場首個個人演唱會展開，因為明年就係佢出道十周年紀念，對自己首個個人音樂會尤其重視。首場演唱會喺火熱、搞笑、感性同感動嘅氣氛下圓滿完成。奮鬥九年嘅周殷廷，忍唔住哽咽落淚，連擔任嘉賓嘅 Gin Lee 都大受感動淚流滿面。

演唱會一開始，身穿蛇皮西裝嘅YAN TING狂野登場，並大騷誘人胸肌，先以一曲《Killa》炒熱現場氣氛，歌迷尖叫聲不斷。緊接又唱又跳，演繹《小姐你好》同《Gonna be alright》。 

周殷廷舉行入行以來首次個唱

本身係導演嘅 YT，特別拍攝咗自己訪問自己嘅片段，以導演YT嘅角度，大談對今次開演唱會嘅感受。隨即獻唱多首由佢執導嘅MV歌曲，包括吳雨霏嘅《今夜星光燦爛》、AGA嘅《Superman》、Mirror嘅《Asap》、Gin Lee嘅《Dum Dum》，再配以勁舞，台下觀眾又繼續報以熱烈歡呼聲。

之後佢又表示，今次演唱會係由YT導演加上藝人周殷廷一齊構思，當中好多音樂同環節都希望大家enjoy。最近周殷廷宣佈同網絡天團JFFT組成新男團JFYT，並推出新歌《Hands Up》。呢日開騷亦唔少得以男團姿態演出，JFYT身穿白色西裝，一出場，全場觀眾即自動「Hands Up」，氣氛高漲。

整晚勁歌熱舞，台下觀眾反應亦非常熱烈

之後又扮韓團大講韓文，佢話香港有好多男團，但JFYT係香港第一天團，又笑指香港有啲團好垃圾，講笑話：「話說薯茄就係一隊垃圾！唔係我哋勁，係你哋廢！」引起全場大笑。佢又笑問觀眾：「我哋有冇Super Junior影子，有啲old school！我都知香港而家有個團好勁，我哋要挑戰，直接抽嬴佢哋！」

之後佢演唱《晨星》時，指歌曲係寫比15歲嘅自己：「我唔太敢望回15歲嘅自己，當時我話想做歌手。我由從無自己嘅演唱會，到今日有3千觀眾，呢首歌叫自己唔好放棄，我堅持20年到今日。我想同大家講，老竇、媽咪、阿哥，希望有令你哋驕傲。」講完佢亦忍唔住哽咽。佢話：「追夢過程係好孤獨，但有好多戰友，有啲人一直陪伴我去拼搏夢想。」

9年來經歷唔少高低起跌嘅佢，呢晚演出時亦非常感觸

之後任嘉賓嘅好友Gin Lee登場，同佢合唱《日出時讓街燈安睡》，Gin Lee亦忍唔住唱到淚流滿面。佢話好少見到YAN TING喊，相反對方經常見到自己喊：「我嗰時喺人生低谷，對生活生命失去動力，好絕望，但又要做歌出碟，係佢不停鼓勵我。佢幫我搞個project，用盡所有精神，出錢出力拍微電影、MV。除咗多謝佢，亦想講對唔住，嗰段時間我狀態非常差，自己顧唔掂自己，但原來佢都經歷低谷，我想到你嗰時幾痛，但你喺垂死最後一口氣都扶我一把，我都應該關心你多啲。我而家狀態好好，我可以扶你。」

嘉賓兼好友Gin Lee喺台上分享同歷低潮時更感激落淚

YAN TING整晚大方展示健碩胸肌，Encore環節時仲真空以白色閃爍外套登場。到演唱尾聲，佢仲明顯非常依依不捨，又同觀眾影大合照留念，又請全場一齊打開手機燈，唱出最後一首歌《My Everything》完結首晚演出。

Encore時Yan Ting大方騷肌