Malibu有人經營民宿,被民政署控告!
1)日出康城有非法民宿、做Airbnb絕非新鮮事,但少有畀人捉到、告埋、定埋罪。
2)日出康城Malibu有個單位被控違反《旅館業條例》5A條,即係管理無牌酒店及賓館,最高刑罰係罰50萬同監禁3年。
3)睇返成交紀錄,出事依個單位喺2018年一手同發展商買入,實呎545,成交價929萬。睇返依個盤,依家租到大概2萬,唔計雜費,租金回報率2.3%。
4)睇返Airbnb,日出康城都仲有幾個單位出租,有間晉海 3房2廳,1日1000蚊左右,康城唔喺咩旅遊區,一個月租到廿日已經好勁,仲要打掃交雜費,不如正正經經成間租畀人。
5)成間做Airbnb計落無咩著數,所以好多都剩係租間房畀你,康城仲有幾個Airbnb盤,都喺租間房,每晚300至500蚊,反正多咗間房,收返1萬幾千係幾好嘅。
6)不過,1萬幾千有唔少風險,除咗有機會畀政府告,亦可能會被銀行要求即時還晒mortgage 、家居保險等等都有機會失效。